Рецепт за брза ужинка со кој најлесно ќе ги натерате децата да јадат зеленчук
Овие корејски палачинки се идеални за сите возрасни што сакаат да пробаат нешто без месо, но и за децата кои тврдоглаво одбиваат да јадат зеленчук. Брзи се за подготовка, а се прават од состојки што најверојатно веќе ги имате дома.
Родителите на мали деца знаат дека приготвувањето храна за нив некогаш знае да биде предизвик. Не им се допаѓа зеленчукот, не им изгледал убаво, не сакаат да јадат...
Мин Квон на својот Инстаграм профил редовно споделува видеа од рецептите што ги подготвува за нејзините деца, а како што вели, овие корејски палачинки се омилени во нејзиниот дом и се начин да се осигури дека нејзините деца внеле доволно здрава храна.
Можете да додадете зеленчук по ваш вкус или, пак, ако сакате и малку лути зачини.
Како се подготвуваат?
Потребни состојки:
- 100g брашно;
- ½ лажиче сол;
- 50g нишесте;
- 170mi вода;
- 3 млади кромитчиња (исечкани на долги ленти);
- 1 мала тиквичка (изрендана);
- 1 морков со средна големина (изрендан);
- Сончогледово масло (за пржење).
Начин на подготовка:
- Тиквичката се ренда со ренде и со помош на газа или цедалка се цеди вишокот вода;
- Во длабок сад се мешаат сувите состојки, па потоа се додава вода и со маталка се меша додека да се добие изедначена смеса;
- Се додава изренданиот зеленчук во тестото и се меша додека да се добие изедначена смеса;
- Во тавата се става масло и се остава да се загрее;
- Со црпалка се зема малку од смесата и се става во тавата, при што треба да се формира тенка палачинка;
- Палачинката се пржи на средна температура по 4-5 минути од едната страна, а потоа се превртува и се пржи уште 3-4 минути од другата страна;
- Готовите палачинки треба да имаат златно кафеава боја;
- Постапката се подготвува сѐ додека целосно не се потроши смесата;
- За полесно послужување можете веднаш да ги исечете на помали парчиња и коцкички.
Видео упатство:
Б. С. Б. | Црнобело
Би можело да ве интересира:
Препорачуваме
Најчитани неделава
