5 домашни сосови кои се одлична замена за мајонез

Се подготвуваат брзо, лесно, вкусни се и здрави и одлична замена се за мајонез ако сакате малку побогат вкус... Дали сте ги пробале?

Обожавате да јадете мајонез - и кога е намачкан на леб, и како сос за пржени компирчиња, во салати, во бургери, со чипс, со сè. 

Доколку сакате малку да промените, а сепак да имате вкусен додаток во јадењата, прочитајте ги рецептите за овие 6 здрави сосови и можеби понекогаш ќе го замените мајонезот со некој од нив.

Кои сосови се одлична домашна алтернатива за мајонезот?

Сос од павлака

• 2 лажици маслиново масло
• 1 лажица сок од лимон (или јаболков оцет)
• 1 лажичка сенф
• 7 лажици павлака
• Сол и бибер по вкус

Изматете ги маслото, сокот од лимон, сенфот, солта и биберот, па во смесата додајте ја павлаката. Убаво спојте ги состојките за да нема грутчиња и сосот е готов.

Може да се користи за салати кои се прелеваат со мајонез или во ладни сендвичи.

Сос од лук и павлака

• 1 шолја павлака
• ½ главица лук
• 5 лажици масло

Излупете го лукот, исечкајте го ситно, па ставете го во блендер заедно со павлаката. Потоа додајте го маслото и повторно мешајте. Доколку сакате можете да додадете бибер или оригано.

Одличен е за зелени салати или со компирчиња, но и за месо.

Сос од кикирики

• 4 лажици путер од кикирики
• 180-200ml вода
• 4 лажици соја сос
• 2 лажици масло од сусам
• 3 лажички јаболков оцет

Во тенџере ставете ја водата да проврие заедно со путерот од кикирики. Додадете го маслото од сусам, а потоа и соја сосот и јаболковиот оцет. Убаво измешајте со лажица за да добиете мазна смеса и послужете го.

Овој сос оди одлично со месо.

Кари сос

• 1 чаша павлака
• 1 лажичка кари
• 1 кисело јаболко

Јаболкото излупете го и исечкајте го многу ситно. Веднаш измешајте го со павлаката и карито.

Идеален е за со пилешко месо, за помфрит или во комбинација со зеленчук.

Сос од краставици и сирење

• 2 краставици
• 6 лажици павлака
• 200g крем сирење
• 2 чешниња лук
• 2 лажички копар

Изрендајте ја краставицата и исцедете го сокот. Додајте ја павлаката, крем-сирењето и лукот исечкан на ситни парченца, па копарот. Измешајте сè убаво во мазна смеса, па послужете го.

Совршен е за салати, со похувани тиквички или модар патлиџан, со чипс...

А. Ј. | Црнобело / фото: Depositphotos.com