Предлог идеи за ужинки за деца, додека се на распуст

Оризови галети, тестенини… Овие рецепти ви нудат различни експериментирања во согласност со желбата и вкусот на вашето дете. Откријте ги и инспирирајте се!

За време на зимскиот распуст родителите често имаат чувство дека целиот ден им поминува во готвење: појадок, ручек, вечера, ужинки...

Најчесто се повторуваат некои исти рецепти, а доколку периодов сакате да внесете некое поинакво мени, тогаш погледнете ги овие неколку идеи кои имаат „простор“ за комбинирање по желба и вкус на вашето дете.

Што можете да им подготвите на децата како ужинка меѓу оброците?

Оризови галети со хумус и краставица

За подготовка на оваа ужинка, изберете оризови галети, па премачкајте ги со хумус.

Одгоре ставете исечкана свежа краставица, а по избор може да ставите и домат, спанаќ или каков било друг зеленчук што го обожава вашето дете.

Оризови галети со џем по избор

Ако детето повеќе избира благи ужинки, тогаш оризовите галети искористете ги во оваа блага варијанта.

Едноставно, премачкајте ги со омилениот џем, а потоа врз нив може да ставите исечкани ореви, бадеми, лешници …

Енергетски топчиња со овес и путер од кикиритки

Ставете овес, путер од кикиритки и суви сливи во блендер.

Блендирајте добро, постепено додавајќи по малку вода, за смесата да не биде премногу сува.

По желба, додајте мед, а од така добиената смеса, формирајте мали топчиња.

Сендвич од палачинки

Направете мини американски палачинки, па комбинирајте ги по желба: во блага или солена варијанта.

За солена варијанта, може да намачкате путер и да комбинирате со омилениот зеленчук.

За блага варијанта, може да ставите џем, нутела, мед…

По желба може да додавате и јаткасти плодови.

Едноставно, ставете една палачинка, премачкајте и одозгора ставете уште една палачинка, а по желба, постапката може да ја повторите со уште една или две палачинки.

Јуфки со спанаќ

Најпрво сварете ги јуфките.

На загреано масло запржете малку кромид, а потоа додајте го спанаќот за да омекне.

Така сварените јуфки додајте ги во тавчето со спанаќот и измешајте убаво.

Оставете ги малку да оладат.

М. Ѓ. | Црнобело