Совршени за домашна забава: Полнети француски лепчиња

Ако се ближи вашиот роденден или планирате забава, тогаш направете си полнети француски лепчиња. Идеална закуска која нема да ви одземе многу време и дефинитивно е совршена за домашни забави.

Можете сами да одберете намирници со кои ќе ги подготвите овие сендвичи или пак направете повеќе видови за сечиј вкус.

Пробајте го овој рецепт, а потоа правете си сами комбинација на состојки. Уживајте во префинетиот оброк:

Потребни состојки:

• 1 француско лепче
• 150 грама сирење
• 150 грама шунка
• 100 грама кашкавал
• 3 супени лажици мајонез
• 3 супени лажици кисела павлака
• 1 свежа краставица
• 1 свежа пиперка
• ½ мала конзерва пченка
• Вегета, сол, црвен пипер, други зачини по желба

Подготовка:

Лебот пречете го на два или повеќе дела, а потоа со помош на нож направете простор во внатрешноста.

Пиперките и краставиците сечкајте ги ситно, а шунката, сирењето и кашкавалот изрендајте ги. Во голем сад помешајте ги зеленчукот, кашкавалот, сирењето, шунката, мајонезот и киселата павлака заедно со 3 или 4 супени лажици од лебот кој ви останал, при сечењето од внатрешноста.

Сето тоа промешајте го убаво, а потоа зачинете ја смесата и со помош на кафени лажички наполнете го лепчето.

Наполнетиот леб, завиткајте го во фолија, а потоа оставете го во фрижидер барем 1 час. Потоа, исечкајте го на кругови и послужете. 

Откога ќе го пробате, опишете ни го уживањето!