Готов за 15 минути: Чоколаден ролат без печење

Идеален колач на брзина кога ви треба да послужите нешто после ручек или со кафе, а немате многу време за во кујна.

Или пак, кога едноставно ви се јаде нешто вкусно и чоколадно, а немате многу трпение за печење и подготвување филови, еве што треба да испробате.

Потребни состојки:

• 2 јајца
• 150g шеќер
• 100g чоколадо за готвење
• 85g маргарин или путер
• ½ шолја сечкани ореви
• 200g бисквити

По желба, може да додадете суво грозје и смокви исечкани на ситни парчиња.

Подготовка:

Во еден сад измешајте ги јајцата со шеќерот, додадете го искршеното чоколадо и маргаринот или путерот. Загревајте додека состојките не се стопат и соединат.

Смесата изладете ја, па во неа додадете ги оревите и издробените бисквити. Добро измешајте.

Ако смесата ви изгледа премногу кашеста, додајте уште малку бисквити.

На работна површина ставете целофан и на него изгмечете ја смесата. Обликувајте ролат и оставете го да се олади.

Може да користите и калапи за обликување на ролатот.

Исечете, послужете и уживајте!