Шарени чоколадни букети: Не се готови за 5 минути, но вредат за секоја потрошена секунда

Сигурно секогаш кога ќе ги погледнете на некоја забава ви предизвикуваат воодушевување и посакувате да имате барем неколку да си ги каснувате по дома или да може да ги изненадите блиските.

Одлични се како декорација на маса, особено за родендени и коктел забави, но колку што се убави, толку се и вкусни.

Можеби не се од оние рецепти кои ќе бидат готови за 5 минути, но ако ги правите со љубов, крајниот резултат ќе ви вреди за сето поминато време во кујната.

Потребни состојки:

• 250g маргарин
• 500g мелени бисквити
• 150g шеќер во прав
• 100g лебни трошки
• 4 јаболка
• 3 пасирани банани
• 200g чоколадо за глазура
• 1 лажица масло

За украсување:

• Кокос во боја
• Бисерчиња за торти
• Шарени трошки
• Дрвени или поцврсти пластични стапчиња

Подготовка:

Изматете го маргаринот со шеќерот во прав, па додајте ги мелените бисквити.

Добро промешајте и соединете ја смесата, а потоа додадете ги ренданите јаболка и пасираните банани. Додавајте ги постепено лебните трошки, за да се згусне смесата. Соединете ја, па ставете ја во ладилник околу половина час за да се стврдне.

Откако ќе ја извадите земајте по малку од неа и правете топчиња како за бомбици. Штом бидат готови топчињата, повторно вратете ги во ладилникот околу 1 час за да ја зацврстат формата.

На сите топчиња набоцкајте ги стапчињата и едно по едно поливајте ги со претходно стопеното чоколадо и брзо наросувајте со шарениот кокос или трошките, но внимавајте да не ви се исуши чоколадото, бидејќи нема да се задржат украсите на него.

Исто брзо треба да ги редите и бисерчињата, едно по едно.

Штом ги направите редете ги во мали вазнички или чаши како чоколадни букети.

Нема послатко и поосвежително чоколадно задоволство кое ќе го обожаваат децата, а ќе предизвика воодушевување кај сите гости.

Ние ги направивме и ни излегоа токму вакви. Пробајте ги, па пратете ни фотографија во коментарите!