Вкусот на детството: Направете си домашни крем банани

Скоро и да не постои некој кој не уживал во вкусот на чоколадните крем банани. Вкусно и слатко нешто кое секој може да си го дозволи и кое децата го обожаваат.

Со секое вкусување ве враќа години наназад кога скришно крадевте по неколку крем банани од кутијата, без да ве видат и караат дека сите сте ги изеле.

Но, дали сте пробале некогаш сами да ги подготвите?

Потребни ви се само неколку состојки:

• 200 ml вода
• 750 g шеќер
• 2 кесички желатин во прав
• 1 шишенце екстракт од банана
• 100 g чоколадо

Постапка:

Нека зоврие водата со шеќерот, додека не почне да пени, па оставете да се излади. Додајте го желатинот во неа, претходно добро растворен. Вратете го тенџерето со вода и желатин на шпорет, па мешајте неколку минути.

Тргнете го од оган и матете со миксерот, па додајте го и екстрактот и мешајте уште малку со миксерот. Потребни ви се и калапи по желба, премачкани со масло во кои ќе ја сипете смесата, и ќе ги ставите  во фрижидер.

На крај полијте ги со стопено чоколадо на пареа и оставете да се стврднат.

Напомена: Доколку немате калапчиња во вид на банани, истата смеса и постапка може да ја сипете во плех, па да исечете коцки.