Рецепт на денот: Брзи крокети од тиквички со ѕаѕики сос

Префинета комбинација од тиквички и фета сирење во залчиња крокети пржени додека не добијат златножолта боја. Звучи вкусно, а исто толку и едноставно за подготовка.

Летниот период изобилува со тиквички, па зошто да не се искористат за подготовка на оброк кој може да го послужите и како предјадење и како главно јадење?

Потребни состојки:

• 400g Изрендани тиквички
• 100g Фета сирење
• 1 Чешне лук
• 2 Млади кромидчиња
• 1 Јајце
• Сол и бибер
• 30g Брашно
• 15g Лебни трошки
• Малку брашно за тркалање на крокетите
• Масло за готвење

Подготовка:

Ренданите тиквички посолете ги и оставете ги 10-тина минути да ја пуштат течноста. Потоа префрлете ги во сад и добро исцедете ги од течноста.

На исцедените тиквички додајте ги фетата, лукот, кромидчињата, јајцето, солта и биберот, брашното и лебните трошки. Добро измешајте ги состојките додека не добиете еднолична смеса.

Со мала лажичка земајте дел по дел од смесата и направете мали кугли тркалани во брашно.

Загрејте го маслото и пржете ги крокетите се додека не добијат златножолта боја.

Готовите крокети можете да ги сервирате со ѕаѕики сос кој можете да го направите по оригинален домашен рецепт.