Казандиби - турски пудинг од ориз

По вкусниот турски Кескул со вкус на Рафаело, следува уште еден примамлив и брз традиционален турски десерт.

Се работи за печен млечник од пудинг кој се подготвува од оризово брашно и млеко.

Се служи добро разладен, а во комбинација со некое овошје е супер летно освежување.

Потребни состојки:

• 1 лажица маргарин
• 3 лажици шеќер во прав
• 120 оризово брашно
• 30g густин
• 1200ml млеко
• 200g шеќер во прав
• 2 пакетчиња ванилин шеќер
• Цимет
• Овошен сос или џем

Подготовка:

Садот во кој ќе го печете десертот треба да го премачкате со маргарин и да посипете 3 лажици шеќер во прав. Ставете го во рерна на 180 степени и печете 7-8 минути додека шеќерот не се карамелизира. Потоа оставете целосно да се олади.

Во меѓувреме направете пудинг од ориз така што во сад за варење ќе ставите брашно од ориз, густин, шеќер и ванилин шеќер, па полека ќе додавате млеко и постојано ќе мешате. Варете 15 минути додека пудингот не се згусне.

Сварениот пудинг ставете го во тавчето со потпечен шеќер и печете на 160 степени околу 30 минути. Печениот пудинг извадете го и ставете го во поголем сад со ладна вода (заедно со тавата во која се печел). Така ќе добие кремаста текстура. Оставете го 10 минути.

Изладениот пудинг ставете го во фрижидер уште неколку часа, па потоа потурете со цимет. Превртете го од тавчето на рамна чинија и декорирајте со овошен сос или џем по избор.