3 нови идеи за вкусни мармалади и слатки

Кога ќе ви досадат стандардните вкусови на мармалади и џемови, време е малку да се испробате во кујна.

Израдувајте ги најмилите и „вооружајте“ се со тегли слатко уживање.

Слатко од бело грозје и ореви

Потребни состојки:

• 1kg исчистено бело грозје (без семки)
• 1kg шеќер
• 150ml вода
• 3-4 парчиња лимон
• 150g ореви

Подготовка:

Грозјето измијте го и исушете го. Исчистете ги семките и отстранете ги скапаните зрна доколку ги има.

Во големо тенџере ставете го шеќерот и водата. На тивок оган растопете го шеќерот, па дури потоа додадете го грозјето. Распоредете го така што целото да биде потопено во сирупот.

Варете на тивок оган додека не згусне, а по потреба додавајте неколку капки вода. Ако се појави пена при варењето, отстранете ја со лажица.

Пред самиот крај додајте ги парчињата лимон и оревите.

Слаткото ставете го во претходно загреани тегли.

Слатко од смокви и ѓумбир

Потребни состојки:

• 950g зелени смокви
• Корен свеж ѓумбир (околу 3cm)
• 100ml сок од лимон
• 500g шеќер за желатирање (џемфикс)

Подготовка:

Смоквите измијте ги, оставете ги да се цедат, исчистете ги и сечкајте на поголеми парчиња. Ѓумбирот исто така измијте го и исечете го на ситни коцки.

Помешајте ги смоквите со ѓумбирот и сокот од лимон, па потоа додадете го џемфиксот. Оставете ги нека отстојат 1 час.

Тенџерето со смесата ставете го да се вари и постојано мешајте. Слаткото ставете го во тегли и веднаш затворете. На кратко превртете ги теглите наопаку, па потоа оставете ги нормално да се оладат.

Желе од јаболка

Потребни состојки:

• 1l сок од јаболка
• 3 лажици сок од портокал
• 1 кесичка џемфикс
• 2 гранчиња свежо нане
• 400g шеќер
• Зачин по желба - цимет, каранфилче, ванила...

Подготовка:

Сокот од јаболка, шеќерот, слатките зачини и џемфиксот ставете ги во длабоко тенџере. Варете околу 5 минути со постојано мешање.

Кога се ќе биде готово додајте го ситно сечканото нане, но претходно добро измијте го. Ставете го и сокот од портокал и повторно промешајте.

Смесата прелијте ја во стаклени тегли. Откако ќе ги наполните 5 минути нека отстојат превртени обратно. Кога ќе се оладат, ставете во фрижидер.