Празничен десерт: Новогодишна елка од бомбици со бисквити

За сите креативни домаќинки кои се заситени од старинските рецепти и традиционални идеи за празниците, имаме мало освежување!

Новогодишната елка од бомбици е идеја која ќе ви заштеди време и пари, а на храната ќе ѝ додаде празничен дух.

За да ги подготвите бомбиците од бисквити ви требаат 20 минути.

Потребни состојки:

• 200g путер
• 150g шеќер во прав
• 150g желе бомбони
• 100g бело или црно чоколадо по желба
• 50g суво грозје
• 150-200g бисквити
• Шеќер во прав, кокос или декоративни трошки во боја за валкање

Подготовка:

Путерот изматете го со шеќерот во прав, а потоа додајте ги останатите состојки - мелените бисквити, сечканите желе бомбони, ренданото чоколадо и на крај сувото грозје.

Соединете ја смесата со рака и правете бомбици.

Бомбиците може да ги извалкате во што сакате - кокос, шеќер во прав, чоколадни трошки или топено чоколадо.

Оставете ги неколку часа во фрижидер да се стврднат, а послужувањето подгответе го на следниов начин:

Од подебела хартија или тенок картон направете конус.

Со чепкалки за заби или стапчиња за ражничи направете дупчиња во конусот. Потоа на нив закачете по една бомбица.

Секогаш може да декорирате по желба - додадете светки или шарени додатоци за торти и колачи.