Слатко од кора од портокали

Сите кои сакаат да направат, пробаат и послужат нешто ново, сега е идеално време да го пробате овој рецепт за слатко од кора од портокали.

Вкусот е освежителен, а мирисот додека го подготвувате буквално ќе биде ароматерапија за сите околу тенџерето.

Потребни состојки:

• 4-5 портокали
• На 100g кори оди 150g шеќер
• Вода
• 1-2 лимони

Подготовка:

Убаво измијте ги портокалите и излупете ја кората на 4 крупни парчиња.

Секое парче исечете го на тенки ленти од 1 до 5 сантиметри, по желба.

Секое парче потоа свиткајте го како полжавче и нанижете на конец.

Измерете ја тежината на кората.

Ставете ги полжавчињата од портокали во лонец и прелијте ги со ладна вода и оставете ги да отстојат 24 часа. Добро би било да ја промените водата 3-4 пати во текот на тие 24 часа.

Исцедете и во лонецот ставете вода колку да ги прекриете корите, па ставете на шпорет да зоврие. Во зовриена вода ставете ја кората и варете 5 минути. Исцедете и повторете 5-6 пати.

Ставете колку што сте измериле (150g на 100g портокали) и додадете вода додека не добиете густ сируп, односно шербет. Додајте ги полжавчињата од портокал.

Варете на тивок оган додека сирупот не се згусне, а кората не стане проѕирна.

Кога варењето е при крај, додадете лимон исечен на кругови и доварете уште 10-15 минути.

Готовото слатко покријте го со влажна крпа, а кога ќе се олади тогаш претурете го во тегли.

Напомена: Од 2 портокали се вадат околу 100 до 150g кори.

Послужување: Слаткото може да се користи за торти и колачи или да се јаде чисто. Сирупот може да се раствори со вода и да се добие сладок сок.

М. Д. | Црнобело