Вкусно малиџано, по рецептот на баба

Овој рецепт се пренесува од колено на колено, од нашите баби, прабаби... Со сигурност е стар преку 20 години, ама е толку вкусен, што останува да се пренесува како добар домаќински рецепт.

Некои го нарекуваат зелен ајвар, некои зелен пинџур, а некои, малиџано.

Не е важно како го нарекуваат, важно е дека е премногу вкусен.

Како да го подготвите?

Потребни состојки:

• 4kg модар патлиџан
• 4kg меснати зелени пиперки за печење
• 1l сончогледово масло
• 150 - 200ml вински оцет
• 200g шеќер
• 150g сенф
• Сол по желба

Подготовка:

Испечете ги модрите патлиџани и пиперките.

Оставете ги да се оладат, а потоа излупете ги и пиперките исчистете ги од семките.

Сомелете ги во машина за мелење месо.

Ставете го маслото да се загрее, а потоа додадете ги и сомелените пиперки и модри патлиџани.

Пржете ги околу час и половина.

На крајот од пржењето додадете ги оцетот, сенфот, солта и шеќерот.

Во зависност од вкусот додавајте го оцетот, некои сакаат рецептот да биде повеќе кисел, а други помалку.

Изборот е ваш.

Смесата додека е уште врела, полека додавајте ја во врели тегли и складирајте ги за во зима.

Кога го послужувате на леб, можете да додадете во него и ореви и малку ситно сечкан магдонос за декорација.

На здравје!

Н. Г. | Црнобело