3 посни солени рецепти за кога идеите ќе ви се потрошат

Ограничувањето на посни состојки може да биде проблем за создавање вкусни рецепти. Но, ако ги имате правите идеи, ништо не е невозможно.

Во продолжение ви нудиме 3 посни солени рецепти, за кога стандардните идеи ќе ви досадат:

Пиперки полнети со туна

Потребни состојки:

• 4 бабури
• 1 конзерва туна
• 2 зрели домати, може и доматно пире
• 1 мал компир
• Средина од 1 парче леб
• 2-3 чешниња лук
• 1 главица кромид
• ½ корен целер
• ½ шолја масло
• Сол, бибер, оригано

Подготовка:

Исчистете им ги рачките на пиперките и исчистете ги од жили и семки.

Помешајте го лебот, ситно сечканите кромид и лук со исечениот домат или доматното пире зависи што користите, изренданиот целер, туната и зачините.

Мешајте додека не добиете компактна смеса и со неа наполнете ги пиперките.

Наполнетите пиперки затворете ги со кругови компир. Попрскајте со маслиново масло и топла вода, па потпечете во рерна додека пиперките не омекнат.

Плескавици од риба

Потребни состојки:

• 300g туна
• 500g ослиќ
• 200g сардина
• 100g варен ориз
• 100g презла
• 10 чешниња лук
• 2 главици кромид
• Лажичка мускатно оревче
• Сол, бибер

Подготовка:

Сварете го ослиќот, исцедете и оставете да се олади. Потоа иситнете го и измешајте го со туната и сардината.

Добиената смеса ставете ја во длабок сад и додадете ги лукот и кромидот. Промешајте ги и варениот ориз и презлата. Додадете ги зачините.

Добро измешајте и формирајте плескавици. Пржете ги во тава на малку масло.

Како прилог може да послужите варен зеленчук.

Солена торта од шампињони

Потребни состојки:

• 500g шампињони
• 1 праз
• ½ коцка маргарин
• 100g посен мајонез
• Кори за розен торта
• Сол, магдонос

Подготовка:

На масло пропржете го празот, па додадете ги ситно сечканите шампињони и исечканиот магдонос.

Маргаринот изматете го со мајонезот и додадете ги изладените шампињони.

Соединете го филот, па потоа мачкајте ги корите. Може да потпечете неколку минути и тортата да ја послужите топла.

М. Д. | Црнобело