Идеални за претстојните слави - 3 одлични рецепти за посни колачиња

Време на пости, време на слави и имендени. Без разлика дали го практикувате божиќниот пост, чекате гости за вашата слава или именден или едноставно сакате да се храните здраво, ние го имаме решението за сите горенаведени ситуации.

Три одлични рецепти за неодоливо вкусни посни колачиња. Со сигурност ќе ве убедат дека се подеднакво убави како и колачињата со јајца и млеко.

Засукајте ги ракавите и фатете се за работа – време е за чинии полни посни колачиња:

Посни бајадери со кокос и суви сливи

Потребно е:

• 1 обланда

За црниот дел:

• 600 gr суви сливи
• 100 ml + уште 200 ml вода
• 250 gr посен маргарин (поделен на два дела)
• 200 gr посно чоколадо
• 250 gr кокос

За чоколадниот прелив:

• 100 gr посно чоколадо
• 4 лажици масло

Ќе ви треба уште:

• 200 gr шеќер
• 100 gr мелен посен кекс (плазма)

Начин на подготовка:

Сомелете ги сувите сливи или ситно исечкајте ги.

Во подлабок сад за готвење ставете ги сливите, водата, маргаринот и оставете ги да се варат на средна температура, додека сè убаво не се соедини. Додадете 200 gr посно чоколадо и мешајте додека целосно не се стопи.

Тргнете го садот од оган и додадете околу 100 gr посен мелен кекс (кекс може да додадете и помалку, во зависност од тоа колку се суви сливите).

Додека смесата е сè уште топла, нанесете ја на ½ од листовите обланда. Убаво израмнете со ножот и оставете да се олади.

Во друг сад ставете да се варат 200 gr шеќер и 200 ml вода додека целосно не се растопат. Потоа додадете ги останатите 125 gr маргарин да се стопат со шеќерната смеса, а на крајот додадете уште 250 gr кокос.

*Внимавајте кокосот да е ситно мелен, бидејќи бајадерите поубаво се сечат кога кокосот е поситен. Доколку е покрупен, домелете го во електрична машина за мелење.

Намачкајте ја белата смеса врз црниот слој додека е сè уште топла.

На крајот стопете го 100 gr посното чоколадо наменето за преливот со 4 лажици масло и прелијте го колачот.

Оставете го добро да се олади и стегне и исечете мали штангли во облик на бајадери.

Посни бомбици со оревчиња и кокос

Потребно е:

• 250 gr мелени ореви
• Сок од 1 лимон
• 250 gr шеќер во прав
• Какао
• Кокос во прав

Начин на подготовка:

Во подлабок сад ставете ги мелените ореви, додадете го шеќерот во прав, сокот од лимон и замесете тесто.

Во смесата додадете го и какаото растворено со малку вода (количината одредете ја според тоа колку сакате да се интензивни на вкус, 2-3 лажици).

Од тестото обликувајте мали топчиња. Едната половина извалкајте ја во какао, а другата половина од бомбиците во кокосово брашно.

Посни медени колачиња со цимет

Потребно е:

• 11 лажици масло
• 11 лажици вода
• 11 лажици шеќер
• 2 лажици мед
• 1 лажица цимет
• 1 пециво
• 500 gr брашно

Начин на подготовка:

Од горенаведените состојки замесете тесто и развлечете кора со дебелина од 1 cm.

Од него со чашка (или некоја друга модла со форма по избор) извадете колачиња од тестото.

Медените колачиња ставете ги во плех со хартија за печење или намачкан со масло и малку брашно и печете ги околу 10-тина минути на 200 °C во загреана рерна.

По желба може да ги посипете со шеќер во прав пред послужување. Одлично одат и со мармалад со сливи или кајсии.

(О)Милена | Црнобело