Нема да одолеете: Посна Добош торта

Добош тортата е унгарски класик, кога се работи за десерти. Оригиналниот рецепт вклучува меки кори и чоколаден крем, а наизменичните редови завршуваат со карамела.

Нејзината посна варијација е достојна замена за сите посни слави и веселби кои ни претстојат, па затоа не мислете двапати пред да ја пробате.

Потребни состојки:

• 150g + 100g шеќер во прав
• 250g мелени ореви
• 250g брашно
• 200g + 100g шеќер
• 3 шолји мед
• 3 реда посно чоколадо
• Шолја кисела вода
• Кесичка ванилин шеќер
• ½ лажичка сода бикарбона
• Екстракт од малина (по желба)

Подготовка:

Помешајте го брашното со 150g шеќер во прав, мед, кисела вода и сода бикарбона. Добиеното тесто поделете го на 10 еднакви дела и печете го во облик на тенки кори, на овален плех измачкан со масло и брашно. Може да испечете и 6 подебели кори, изборот е ваш.

Филот подгответе го на оган со средна јачина. Измешајте 200g шеќер со 1 чаша вода, додадете ги мелените ореви, чоколадото и ванилиниот шеќер. Промешајте додека не добиете еднолична смеса. Оладете.

Редете од филот врз секоја кора и финиширајте со глазура која ќе ја направите на следниов начин:

100g бел шеќер промешајте со малку вода и затоплувајте додека не се стопи. Добиениот шербет тргнете го од оган да се олади, па потоа додавајте го постепено шеќерот во прав (100g). Може да додадете арома од малина или друг вкус.

Прелијте ја тортата, оладете и сечете триаголници.

М. Д. | Црнобело