Брз џем од кајсии, кој палачинките го обожаваат

Вкусниот џем од кајсии е кралот на појадоците, посебно ако е намачкан на топла, мека палачинка.

Направете си брз џем во 3 едноставни чекори и уживајте во неговиот вкус со месеци.

Потребни состојки:

• 1,5 kg свежи кајсии
• 1 kg шеќер
• 200ml јаболков сок
• 1 поголем лимон
• Парче путер

Подготовка:

Прв чекор

Исчистете ги кајсиите и измијте ги убаво. Исечкајте ги на парчиња, ставете ги во големо тенџере и додадете го јаболковиот сок. Варете додека смесата не зоврие, намалете ја температурата, па проварете уште 10-тина минути додека кајсиите не омекнат.

Втор чекор

Во смесата додадете ги шеќерот и сокот од еден лимон, па промешајте. Варете на средна температура уште 20-тина минути.

Трет чекор

Тргнете го тенџерето од рингла и отстранете ги нечистотиите од врвот на смесата, доколку ги има. Во жешкиот џем додадете парче путер и добро промешајте. Нека се излади 10-тина минути, па потоа ставете го во топли, стерилизирани тегли. Поклопете и чувајте на темно и ладно место.

Совет плус:

Не сте сигурни дека џемот е готов? Со дрвена лажица ставете мала количина од жешкиот џем на ладна чинија (која претходно сте ја изладиле во замрзнувач). Почекајте точно 1 минута. Ако чинијата можете да ја превртите наопаку без џемот да се растече, рецептот е готов. Во спротивно, продолжете да варите уште неколку минути.

М. Д. | Црнобело