3 брзи солени рецепти за гости кои обожаваат да јадат со прсти

Ако сте од оние кои преферираат опуштени и неформални дружби и вешто го одбегнуваат приборот за јадење, овие рецепти се вистинско мало откритие.

Се прават брзо и лесно, а уште побрзо ги снемува од масата. Несомнено ќе ги обожаваат сите, како возрасните, така и помалите.

Дали сте можеби за солени стапчиња со фил и мортадела, мини-пици кои наместо тесто имаат подлога од свежа тиквичка или пак можеби сакате вистинско лиснато тесто наполнето со вкусна рикота и шунка? Продолжете со читањето (и подготовката) на следните три вкусни јадења:

Солени „цвет“ стапчиња

Потребни состојки (за 2 лица):

• 150 gr мортадела
• 1 пакување долги грисини
• Малку маслиново масло
• 200 gr свежо меко сирење
• Зачини (власец, босилок, мајчина душица, нане или други зачини по желба)
• Неколку стебленца свеж власец

Начин на подготовка:

1. Исечканите свежи или сушените зачини по желба измешајте ги заедно со свежото сирење и направете фил.

2. Додадете малку маслиново масло и добро соединете ги додека не добиете фина кремаста смеса.

3. На парче мортадела нанесете малку од филот и поставете ја грисината. Замотајте и зацврстете ја завитканата мортадела со парче свеж власец.

Мини-пици со тиквички

Потребни состојки:

• Тиквичка
• 125 gr шунка
• 50 ml доматно пире
• Рендан кашкавал
• Магдонос или оригано
• Сол

Начин на подготовка:

1. Измијте ја тиквичката и исечете тркалца со дебелина од 1 cm.

2. Потпечете ги тркалцата од двете страни на грил тава или скара и оставете ги малку да се оладат.

3. Премачкајте ги со доматно пире, нанесете рендан кашкавал, па шунка и зачини по желба.

4. На крајот, вратете ги во загреана рерна 1-2 минути, колку да се растопи кашкавалот.

Перничиња со шунка и рикота

Потребни состојки (за 12 парчиња):

• 450 gr лиснато тесто
• 150 gr шунка
• 200 gr спанаќ
• 250 gr рикота
• 100 gr тврд кашкавал гауда
• 2 јајца
• Мускатно оревче, сол, црн пипер

Начин на подготовка:

1. Загрејте ја рерната на 200˚С.

2. Расукајте го лиснатото тесто и од него исечете 12 мали квадратчиња со димензија 10×10 cm.

3. Добро иситнете го свежиот измиен спанаќ, а шунката исечете ја на ситни коцкички. Помешајте ги двете состојки со рикотата.

4. Додадете ја ситно ренданата гауда, зачинете по желба и добро измешајте ја смесата.

5. Со лажица црпнете малку од филот и истурете во средината на квадратот лиснато тесто.

6. Рабовите завиткајте ги навнатре и премачкајте со разматените јајца, со цел перничињата да добијат убава златно-жолта боја.

7. Печете во загреана рерна од 18-20 минути и послужете додека се топли.

(О)Милена | Црнобело