Идеално велигденско благо - Розен бајадери со плазма и ореви

Дали ви е потребен брз и едноставен рецепт за претстојните велигденски празници? Нешто што се подготвува едноставно, а од кои ќе излижете прсти и вие и гостите?

Доколку обожавате бајадера време е да подготвите една мала варијација на рецептот. Овој вклучува розен кори кои најмногу нè потсетуваат на детството.

Потребни состојки:

• 1 пакување розен кори
• 500 ml млеко
• 300 gr шеќер
• 150 gr путер
• 100 gr бело чоколадо
• 300 gr мелен плазма кекс
• 250 gr мелени ореви

Глазура:

• 100 gr чоколадо
• 3 лажици масло

Начин на подготовка:

1. Ставете го млекото во подлабок сад на оган и додадете го шеќерот. Мешајте додека не се стопи во млекото.

2. Кога ќе почне да врие додадете го путерот и искршеното бело чоколадо на парчиња.

3. Мешајте додека сè добро не се соедини. Потоа тргнете го тенџерето од огнот и додадете ја плазмата и мелените ореви. Измешајте ја смесата и оставете ја добро да се олади.

4. Почнете со мачкање на розен корите, но немојте да ставите премногу фил. Доволни ви се 4 мали лажички врз секоја кора, рамномерно намачкани.

5. Откако ќе ги намачкате и наредите сите розен кори една врз друга, покријте ја бајадерата со крпа и ставете некој потежок предмет врз неа, плех или книга, со цел да ја притисне бајадерата и добро да ја соедини. Оставете ја да отстои така 1 час.

6. Во меѓувреме, подгответе ја глазурата. На пареа стопете го чоколадото за готвење со 3 лажици масло. Полијте ја розен бајадерата со глазурата.

7. Оставете ја во фрижидерот добро да се стегне, додека не се спојат сите вкусови. Потоа, исечете ја на мали правоаголници и послужете на собна температура.

(О)Милена | Црнобело