Неодоливо уживање: Слатки бели бомбици полнети со карамел

Изгледаат неверојатно, а вкусот го надминува и изгледот. Ќе се вљубите во овие топчиња од бело чоколадо полнети со карамел уште на првото пробување.

Се прават лесно и иако ќе ви биде потребно малку повеќе трпение, резултатот ќе се исплати на крајот. Најдобро е да си направите дупла доза бидејќи ќе ги снема за минутка.

Потребни состојки

За карамелот:

• 200 g шеќер
• 70 g омекнат путер
• 80-120 ml слатка павлака

Течни состојки:

• 3 јајца
• 1/3 шолја масло за готвење
• ½ шолја млеко
• 1 лажичка екстракт од ванила

Тврди состојки:

• 180 g брашно
• ¼ лажичка нишесте
• 1 лажичка печиво
• ½ лажичка сода бикарбона
• Прстофат сол
• 130 g шеќер

За сосот од бело чоколадо:

• 150 g бело чоколадо
• 1 шолја слатка павлака за готвење

Начин на подготовка:

1. Прво, направете го карамелот. Во подлабок сад ставете го шеќерот и постојано мешајте на средна температура додека не добиете златнокафеава смеса.

2. Полека додадете го путерот и постојано мешајте. Уште 2-3 минути. Внимавајте, додавањето на путерот ќе предизвика шеќерот да зоврие со меурчиња.

3. Полека додавајте ја слатката павлака во смесата и не престанувајте со мешање уште 1 минута, а потоа тргнете го тенџерето од огнот.

4. Оставете комплетно да се олади во фрижидерот во текот на ноќта.

5. На ред е цврстата смеса за бомбиците. Загрејте ја рерната на 180˚С и премачкајте кружен калап за печење со путер или ставете хартија за печење.

6. Прво измешајте ги течните, а потоа додадете ги тврдите состојки. Мешајте додека не добиете еднолична смеса. Префрлете ја во тавчето за печење и печете околу 40 минути. Со чепкалка проверете дали „тестото“ е печено. Оставете добро да се олади.

7. Додека колачот се лади, подгответе го сосот од бело чоколадо. Во огноотпорен сад ставете го белото чоколадо. Загрејте ја павлаката за готвење, а потоа истурете ја врз чоколадото, со постојано мешање.

Составете ги бомбиците!

1. Иситнете го колачот со раце и направете го во вид на трошки. Врз него додадете го сосот од бело чоколадо и мешајте додека не добиете хомогена смеса која не се одвојува и распаѓа.

2. Од тврдиот карамел одвојте мало топче со лажиче или со рацете.

3. Со помош на лажица за сладолед земете од смесата (колач+бел сос) и оформете поголемо топче. Во средината ставете го помалото топче од карамел.

4. Вака подготвените топчиња ставете ги во замрзнувач најмалку 1 час.

5. На крајот прелијте ги со уште малку течно бело чоколадо и декорирајте по желба.

(О)Милена | Црнобело