Десерт на денот: Лесна торта со редени слоеви сладолед

Десерт кој не треба да го печете, само треба да наредите неколку слоеви сладолед и да го замрзнете – звучи идеално за лето, нели?

Во лето, кога ретко кој сака да пече и да поминува многу време во кујна на топло, брзите, лесни и ледени десерти ни се омилени.

Овој летен десерт ќе ви дојде како одлично чоколадно освежување, а се подготвува многу лесно.

Сè што треба да направите е да издробите Oreo или слични колачиња и одозгора да редите слоеви купечки или домашен сладолед, шлаг и чоколадна глазура и да замрзнете.

Можете да одберете вкусови и состојки по ваша желба, а ние ги предлагаме следниве:

Потребни состојки:

• 36 сендвич колачиња (Oreo или слични)
• 115g несолен путер, стопен
• Една кутија чоколаден сладолед, омекнат
• Една кутија сладолед по желба (карамел, бисквити, лешник или нешто друго)
• 400g чоколадна глазура или прелив
• Шлаг пена
• Трошки за декорација

Начин на подготовка:

Издробете ги колачињата во блендер и измешајте ги со стопен путер. Истурете ја смесата во тава и измазнете ја, па ставете да се замрзне 15-тина минути.

За тоа време, измешајте го во сад чоколадниот сладолед за да нема смрзнати грутки додека не добиете мазна смеса. Истурете го сладоледот врз смрзнатите колачиња и ставете повторно во замрзнувач 15 минути.

За тоа време, истурете го и другиот сладолед во сад и добро измешајте додека смесата не стане мека и мазна. Полека истурете го врз чоколадниот сладолед и повторно замрзнете 15 минути.

Истурете ја чоколадната глазура врз вториот слој сладолед, но ако е топла внимавајте може да се соедини со сладоледот (што не е страшно). Замрзнете уште 15 минути.

На крај ставете шлаг пена и декорирајте со чоколадни или шарени трошки или со други додатоци по желба.

M. M. | Црнобело