3 предлози за лесен ручек со зеленчук на скара

Не мора да ја користите вашата скара само за месо. Имено, зеленчукот приготвен на скара има одличен вкус, а секогаш е поздрава опција од месото. 

Во продолжение погледнете три предлози за ручек со зеленчук на скара:

Вегетаријански ражничи

Потребни состојки:

• 1 лажица маслиново масло
• 1 лажица рузмарин
• 1 црвена пиперка
• 1 зелена пиперка
• 1 жолта пиперка
• 1 чешне лук
• 1 тиквичка
• 4 помали домати
• 2 главици кромид
• Сол и бибер

Начин на подготовка:

Исечкајте ги пиперките и тиквичката на мали парчиња. Лукот исечкајте го ситно, а доматите на четвртини. Ситно исечкајте го и рузмаринот. Измешајте ги состојките и додајте маслиново масло. Додајте бибер и сол по вкус.

Земете 8 стапчиња за ражничи и на нив наредете го зеленчукот. Ставете ги на скара со средно јака жар и печете најмногу 12 минути со често превртување.

Домати на скара со сос од сенф

Потребни состојки:

• 2 средни домати
• Сол и бибер
• 3 лажици сенф
• 2 лажици јаболков оцет
• 125 ml маслиново масло
• Малку свеж магдонос

Начин на подготовка:

Загрејте ја скарата и одржувајте ја со средно јака жар. Парчињата домат премачкајте ги со маслиново масло од двете страни. Додајте сол и бибер.

Во мал сад измешајте ги сенфот, оцетот, солта и биберот и мешајте додека не добиете хомогена смеса. Додајте и малку маслиново масло и исечкан магдонос.

Печете ги доматите околу 5 минути на секоја страна. Тргнете ги од скарата, па премачкајте ги од двете страни со сосот од сенф.

„Шницли“ од карфиол

Потребни состојки:

• 2 големи карфиоли
• 1/4 шолја маслиново масло
• 2 лимети
• 2 чешниња ситно рендан лук
• 1 лажица мед
• 1 лажица бибер
• 1 лажица сол
• 1/4 шолја ситно исечкан магдонос

Начин на подготовка:

Исечете го карфиолот на парчиња. Во сад измешајте ги маслиново масло и сокот од лимета, па додајте ги исечканиот лук и медот. Во друг сад измешајте ги пиперот и солта.

Загрејте ја скарата на среден оган. Премачкајте ги парчињата карфиол со масло и лимета, па ставете малку сол и пипер. Страната на којашто се солта и биберот ставете ја врз скарата. Печете 5 до 6 минути.

Тргнете го карфиолот од скарата и наросете со исечкан магдонос.

Спирова С. | Црнобело