Летен колач без печење, со редени бисквити и праски

Овој лесен колач со праски со сигурност ќе ви стане омилен рецепт во чиј вкус ќе уживате цело лето.

Искористете ја сезоната на праските и наместо да уживате само во нивниот свеж вкус, вметнете ги во колач со уште неколку состојки.

Летниот колач се подготвува лесно, состојките се мешаат и редат, а нема потреба да го печете.

Можете да го наредите по желба и секој пат да експериментирате со додавање нешто ново за поинаков изглед и вкус. 

Потребни состојки:

• 400g бисквити
• 5 праски
• 700ml вода
• 8-10 лажици шеќер
• 2 пудинзи од ванила
• 1 кесичка ванилин шеќер
• 2 лажици густин + 10 лажици вода
• 2 полни лажици мармалад од кајсии/праски
• 1 шлаг
• Декорација по желба

Начин на подготовка:

Излупете ги праските и исечкајте ги на ситни парчиња, па ставете ги во водата со шеќер и ванилин шеќер.

Оставете да се варат околу 5-10 минути, а пудингот и густинот изматете ги со 10-те лажици вода, па додадете ја мешавината во праските. Оставете да се вари уште кратко и пред да го тргнете садот од оган додадете го мармаладот.

Бисквитите наредете ги во длабок сад во еден или два слоја, а врз нив истурете тенок слој од топлата смеса и размачкајте убаво. Повторно наредете бисквити и намачкајте од смесата. Постапката повторувајте ја додека имате смеса, а најгоре оставете слој бисквити.

Ставете во фрижидер да се излади, а потоа ставете шлаг одозгора. Декорирајте по желба - со рендано чоколадо, парчиња праски, мелени лешници или бисквити или нешто друго по ваш избор.

Можете да експериментирате и да додадете повеќе праски, цели парчиња или смелени, сладолед, некој друг вкус или додаток – секојпат десертот може да изгледа различно.

М. М. | Црнобело