Летна чоколадна пита со сливи – слатко уживање за кое ќе ви треба голема виљушка

Една од причините поради кои го сакаме летото е изобилството од овошје, а црните сливи не се никаков исклучок.

Овој пат ви предлагаме да ги употребите во прекрасна чоколадна пита. Внимавајте, се јаде навистина брзо, а ќе ви биде потребна голема виљушка (и за подготовка и за јадење) на ова слатко уживање.

Потребни состојки:

* За тестото

• 300 g остро брашно
• 20 g какао во прав
• 50 g шеќер
• 75 g ладен путер
• 1 лажица кисела павлака
• 100 g стопена чоколада
• 1 јајце

* За чоколадниот крем

• 150 g путер
• 70 g шеќер
• 3 жолчки
• 1 мала лажичка екстракт од ванила
• 100 g стопено чоколадо
• 10 преполовени, зрели, црни сливи

Начин на подготовка:

1. Загрејте ја рерната на 200 °C.

2. Во подлабок сад измешајте ги прво сувите состојки: брашното, какаото, шеќерот и ладниот путер. Обидете се со миксер или со помош на виљушка да направите смеса. Потоа додадете лажица кисела павлака, јајцето и стопеното чоколадо. Добро измешајте и замесете меко тесто. Сепак, внимавајте, не смее да ви се лепи на прстите, па доколку е потребно слободно додадете уште малку брашно, со цел тестото да стане меко и еластично.

3. Обликувајте го тестото во голема топка и замотајте го во проѕирна фолија. Оставете го во фрижидерот да отстои околу 30 минути.

4. Во меѓувреме, подгответе го чоколадниот крем. Во друг подлабок сад измешајте ги сите горенаведени состојки за кремот и матете со миксерот додека не добиете смеса со свиленкаста текстура.

5. Во сад за печење кој сте го обложиле со хартија и малку масло распоредете го тестото, избоцкајте го на неколку места со виљушка и печете 15 минути.

6. Извадете го тестото да се олади околу 10-тина минути. Потоа додадете го чоколадниот крем и наредете ги преполовените сливи. Вратете ја питата во рерната да се допече, од прилика уште 35 минути додека не забележите дека кремот го зголемил својот волумен.

(О)Милена | Црнобело