Полнети пилешки плескавици со моцарела – ќе излижете прсти

Доколку ви се досадија стандардните плескавици од мелено месо време е да ги подготвите овие пилешки полнети со моцарела (или друго сирење/кашкавал по избор).

Сепак, поради зачините ја препорачуваме моцарелата како најнеутрално сирење по вкус, кое лесно се топи и има способност да се „тегне“ според текстурата, нешто што го обожаваме сите.

Потребни состојки:

• 500 g бело, пилешко, зготвено месо
• 1 јајце
• 5 лажици лебни трошки
• 2 главици кромид со средна големина
• Моцарела (или кашкавал по избор, фета сирење…)
• Сол, бибер, магдонос и други зачини по вкус

Начин на подготовка:

1. Во блендер или „сецко“ ставете ги сите наведени состојки, освен моцарелата. Потребно е да добиете густа, компактна смеса од која лесно ќе може да обликувате плескавици.

2. Во средината на плескавиците ставете парчиња моцарела или некој друг кашкавал, по избор. Добро затворете ги и пржете на средно загреана температура на путер или сончогледово масло, додека двете страни од плескавиците добро не заруменат.

3. Наместо да ги пржите, можете и да ги испечете во загреана рерна на 180˚С на хартија за печење исто додека добро не поруменат (сепак, имајте предвид дека многу посочни ќе бидат испржени, отколку печени).

4. Во кружни лепчиња за бургери намачкајте домашен кечап или салца. Ставете ја плескавицата во лепчето и – загризете.

(О)Милена | Црнобело