Солени, декоративни корпи, совршени за празничната, велигденска трпеза

Солените корпи се едно од омилените предјадења, вкусни, мали залачиња и одлично мезе пред преминување на главното јадење.

За велигденските празници подгответе ги овие брзи, солени корпи. Немојте да се грижите доколку ви остане вишок, доколку тоа е возможно, ќе си ги каснете за појадок наредниот ден.

Потребни состојки за 36 корпи:

• 200 gr брашно
• 1 лажичка прашок за печиво
• 10 gr сусам (црн или обичен)
• ½ лажичка сол
• 20 gr мелено ленено семе
• 100 ml газирана вода
• 100 ml масло
• За филот: (по сопствен избор и желба) ајвар, печеница, сирење, кашкавал, павлака, маслинки, кисели краставички, итн…

Начин на подготовка:

1. Во подлабок сад ставете го брашното, додадете го прашокот за печиво, сусамот и меленото ленено семе. Добро промешајте ја сувата смеса, па додадете ја газираната вода и маслото за јадење. Мешајте додека смесата не стане мазна и компактна.

2. На површина на која сте ставиле малку брашно развлечете тенка кора, со околу 3-4 mm дебелина. Извадете мали кругови со помош на модла или тенка чаша.

3. Исечканите кругови поставете ги на задниот дел од капа за мафини а дното избоцкајте го со виљушка. Печете во загреана рерна 7-8 минути на 200 °C или додека не се заруменат.

4. Извадете ги и оставете добро да се оладат пред да ги филувате.

5. Во поглед на филот креативноста ви ја оставаме вам. Може да ги наполните со ајвар, сирење и маслинки, потоа фил од павлака и кисели краставички во комбинација со печеница, итн… можностите се многубројни.

Доколку ви е потребна визуелизација на рецептот, погледнете го видеото:

(О)Милена | Црнобело