Велигденски десерт: Збогатете ја трпезата со вкусен колач од морков

Ако досега не сте пробале колач од морков, деновиве имате одлична можност за тоа.

Овој колач е едноставен за правење, не е тежок за јадење и, најважно од сè, има неверојатен вкус.

После само првиот залак, овој десерт сигурно ќе стане задолжителен дел од вашата празнична трпеза.

Потребни состојки

Тесто:

• 4 јајца
• 2 шолји кафеав шеќер
• 2 шолји брашно
• 3 лажички цимет
• 1 кесичка прашок за печиво
• 1 кесичка ванилин шеќер
• 2 лажички сода бикарбона
• 2 децилитри масло
• 4-5 поголеми моркови, изрендани
• Сок од половина лимон

Фил:

• 200 грама крем-сирење
• 1,5 шолја шеќер во прав
• 2 лажички ванилин шеќер
• 2 лажици путер
• Сок од половина лимон
• Изрендана кора од лимон

За декорација:

• Бадеми, ореви или други јаткасти плодови

Начин на подготовка

Тесто:

Измешајте го брашното со сите суви состојки, а потоа додајте ги изренданите моркови.

Изматете ги јајцата со виљушка и додајте ги во смесата со брашно, заедно со преостанатите состојки. Добро измешајте ги сите состојки додека не добиете хомогена смеса.

За колачот најдобро да користите длабока тава, по можност со кружна форма. Ставете ја смесата во тавата и печете 40-50 минути на 180 степени.

По некое време добро би било да го покриете колачот, за да не се препече горниот дел.

Фил:

Оставете го путерот да омекне на собна температура.

Ставете ги сите состојки за филот во еден сад и измешајте со миксер.

Кога колачот ќе се испече, прелијте го со филот и оставете го малку да се излади.

На крај, декорирајте со вашите омилени јаткасти плодови.

Тестото можете да го поделите и на два дела, за да добиете две кори. Во овој случај, ставете фил помеѓу двете кори и врз целиот колач.

Доколку го правите колачот на овој начин, ќе треба да ги дуплирате состојките за филот.

Спирова С. | Црнобело