2 освежителни, летни салати – се спремаат за 10 минути

Како што температурите се качуваат, а ние се подготвуваме за плажа, така менито ни станува многу поограничено и лесно.

Сепак, иако состојките се ограничени на исклучиво свежи и ладни, без многу готвење, не значи дека не може да експериментирате.

Овие две освежителни, летни салати се идеални за деновите кога не ви се готви. Ќе ви требаат 10 минути и неколку различни состојки.

Салата со калинка, портокал и домат

Состојки:

• 200g млад спанаќ
• 200g рукола
• 200g зелена салата
• 1 шолја исчистена калинка
• 1 шолја крутони
• 1 портокал исечкан на парчиња
• 50g сушен домат
• Малку сусам

За прелив:

• 1/3 шолја маслиново масло
• 2 лажици сок од портокал
• 2 лажици сок од лимон
• 1 лажица балсамико
• 30ml мед
• Сол и бибер по желба

Сите состојки измешајте ги во длабок сад, па на крај проросете со сусам. Состојките за сосот ставете ги во една тегличка, промешајте ги и прелијте ја салатата.

Салата со овошје и козјо сирење

Состојки:

• 1 тиквичка
• ½ краставица
• 1 морков
• 1 нектарина праска
• 150g микс зелена салата
• 100g јагоди
• 100g козјо сирење

За прелив:

• 1 лажица сенф
• 1 лажица мед
• Сол и бибер или зачин по желба
• 50ml балсамико
• 100ml масло

Зеленчукот и овошјето исечкајте ги на ситни коцки или кругови, по желба. Оставете ги во фрижидер, да станат покрцкави и да се измешаат вкусовите.

Подгответе го сосот со мешање на сите состојки во тегличка. Прелијте го зеленчукот, па на крај проросете го сирењето.

М. Д. | Црнобело