5 едноставни сосови со кои ќе го подобрите вкусот на секое јадење

За да направите вкусен оброк не мора секогаш да трошите време и енергија со комплицирани рецепти.

Некогаш доволно е да направите сос кој значително ќе го подобри вкусот и на наједноставното јадење.

Па, погледнете неколку едноставни рецепти за домашни сосови кои можете да ги комбинирате со многу оброци:

Домашен табаско сос

Потребни состојки:

• 6 чили пиперчиња
• 4 домати
• Кромид
• 2 чешниња лук
• Маслиново масло
• Магдонос
• Малку шеќер
• 1 лажица оцет
• Сол и бибер

Начин на подготовка:

Отстранете ги семките од пиперчињата и исечкајте ги ситно, па оставете да отстојат во сад со жешка вода околу половина час. Излупете и исечкајте ги доматите, кромидот и лукот, па ставете ги во блендер заедно со пиперките. На тава загрејте малку масло, додајте ја блендираната смеса и исечканиот магдонос. Гответе додека сосот не стане густ. На крај додајте шеќер, оцет, сол и бибер.

Сос со лук и кашкавал

Потребни состојки:

• 100 грама тврд кашкавал
• 2 чешниња лук
• 100 милилитри хопла за готвење
• Сол и бибер по вкус

Начин на подготовка:

Изрендајте го кашкавалот, исечкајте го лукот многу ситно и измешајте го со кашкавалот во тава. Додајте хопла, сол и бибер. Ставете ја тавата на среден оган и мешајте постојано додека не добиете хомогена смеса. Слободно додајте повеќе кашкавал или лук според вашиот вкус.

Цацики

Потребни состојки:

• 250 милилитри павлака
• 40 грама магдонос
• 70 милилитри маслиново масло
• 2 лажици лимонов сок
• 1,5 лажици балсамико оцет
• Чешне лук
• Сол по вкус

Начин на подготовка:

Исечкајте го магдоносот, ставете ги сите состојки во блендер и блендирајте.

Сос од модар домат и ореви

Потребни состојки:

• 1 модар домат
• 3 лажици маслиново масло
• 2 лажици лимонов сок
• 1/3 шолја ореви
• Сол по вкус

Начин на подготовка:

Направете дупки во модриот домат со виљушка и испечете го во рерна. Исечкајте ги оревите, исечете го модриот домат на половина и со лажица одделете го од лушпата. Ставете ги сите состојки во блендер и блендирајте додека не добиете хомогена смеса.

Сос со цвекло и естрагон

Потребни состојки:

• 2 цвекла
• 3 лажици маслиново масло
• 150 грама козјо сирење
• 2/3 шолја естрагон
• Јаткасти плодови за декорација

Начин на подготовка:

Сварете го цвеклото и оставете го да се излади во водата во којашто го варевте. Исечкајте ги цвеклото и естрагонот, па ставете ги сите состојки во блендер. Ако сосот е многу густ, додајте малку од водата во којашто го варевте цвеклото.

Спирова С. | Црнобело