„Мојот прадедо бил војвода со Гоце Делчев, а јас сакам да ги истражам своите македонски корени“ – Милош Биковиќ за кариерата и животот

Детали

понеделник, 15 мај 2023

„Кога ја прифатив улогата во филмот што се снимаше во вселената, знаев дека ќе има предизвици, но не бев свесен дека ќе бидат толку големи. Прво вежбавме со хирурзи пред снимањето и учевме како се држат инструментите за кога ќе снимаме, дури и во бестежинска состојба, да го правиме тоа правилно, како да оперираме цел живот. А потоа нè ставија во авион кој почнува да паѓа во слободен пад и одеднаш се најдовме во бестежинска состојба каде што сè околу нас лебди, лета и ти не можеш да застанеш“, вели Милош Биковиќ во интервју за CRNOBELO.com.

Првата асоцијација за Милош Биковиќ е регионална филмска ѕвезда. И навистина е таков – актер кој почна скромно уште од дете, со мали улоги во српски серии, за да стигне до една од главните улоги во рускиот филм „Предизвик“, кој истовремено е и првиот филм снимен во вселената.

Тој никогаш не сакал да глуми во Холивуд, а сепак донесе многу холивудски актери во Србија, вклучувајќи ги Џони Деп, Вилијам Болдвин, Ерик Робертс...

И покрај тоа што најчесто делува резервирано, кога ќе ви се насмее, се топите пред неговиот шарм.

Умерен во одговорите, познат и како човек што ја крие својата приватност, во интервју за CRNOBELO.com Милош зборуваше за неговиот прадедо, војводата Иван Биковски кој бил во иста чета со Гоце Делчев, за предизвиците со кои се соочил кога снимал во бестежинска состојба во авион што паѓа, но и за тоа колку е важно да имаш партнер кој те поддржува.

Во продолжение целото интервју на Милош Биковиќ за CRNOBELO.com:

Првпат си во Скопје за премиера на некој твој филм, иако публиката те чекаше и за „Монтевидео“ и „Јужен ветер“, но некако, се погоди тоа да е за „Предизвик“, првиот филм снимен во вселената. Како се чувствуваш?

Да, така некако се поклопуваше секогаш во времето на скопската премиера да сум некаде на пат.

Но сега сум конечно тука, во земјата од каде што потекнува моето семејство и се радувам на средбата со фановите малку подоцна.

Убаво ми е, пријатно.

Пред неколку години откри дека имаш потекло од Берово и дека пред да се преселат твоите предци во Србија, сте биле Биковски. Си бил ли некогаш таму и имаш ли желба да одиш и да ги истражиш своите македонски корени?

Не сум бил никогаш во Берово, но имам желба и ќе отидам некогаш. Неодамна некој портал објави приказна која ми е многу интересна.

Мислам, јас сега не знам дали е тоа реална и колку може да ѝ се верува на таа информација, а пишуваше дека Иван Биковски, некој македонски војвода, бил мој прадедо и дека бил во иста чета или организација со Гоце Делчев.

Но, многу е интересно дека тој Иван Биковски, на таа фотографија што ја нашле од она време, многу личи на мојот чичко. И кога ги споредувам, си велам, па, тоа е таа генетика, постои врска.

И навистина ние во нашето семејно дрво имаме Иван Биковски за кој знаеме дека бил дедо на мојот чичко.

Така што, можно е да се тоа вистински приказни, дека постои некаква врска, само не сум сигурен околу неговото потекло кој е и што е, но многу би сакал да го дознаам тоа.

Постојано си на релација Белград – Москва, а сега со промоцијата на филмот „Предизвик“ патуваш и низ регионот. Дали ти станува мачен животот во куфери и се чувствуваш ли уморен по малку од сето тоа трчање на сите страни?

Да, уморен сум, затоа што од февруари, па еве сега до мај, спремав претстава, имав некои снимања, па имавме премиера и 15-16 изведби на претставата, а сега влегувам и на ново снимање.

Така што мислам дека до средината на јули ќе имам обврски, но се надевам дека после тоа ќе можам да се одморам.

Продолжува на следната страница...