Видео од евакуација на авион во Белград – Наместо да бегаат, патниците го земаат багажот

Детали

петок, 01 март 2024

„Оставете го багажот и излезете“ - ги опоменуваат стјуардесите патниците во авионот. Ова се гледа во видеото од синоќешната евакуација на белградскиот аеродром, кога имало дојава за бомба.

Синоќа (29.02), на белградскиот аеродром „Никола Тесла“ итно бил евакуиран авион по дојава за бомба. На социјалните мрежи е објавено видео на кое се слуша како стјуардесите се трудат брзо да го спроведат процесот на евакуација, но имале проблем со патниците кои не сакале да се одвојат од својот багаж.

„Спуштете ги појасите. Оставете го багажот и излезете“ – им велат стјуардесите на патниците кои треба да се спуштат со тобогани од влезната врата на леталото.

Еден од присутните патници на Инстаграм објави видео од евакуацијата, кое брзо се прошири на сите социјални мрежи, а во него е јасно видливо дека некои од патниците му давале приоритет на нивниот багаж.

Според информациите на српските медиуми, дојавата за бомба пристигнала околу 19.15 часот, по што патниците веднаш биле евакуирани.

Аеродромот беше затворен за сообраќај сѐ до 22.30 часот, а потоа било утврдено дека дојавата за бомба е лажна.

Инаку, видеото што имаме можност да го погледнеме на социјалните мрежи укажува дека како патници во авиосообраќајот, ни недостасува основна култура и познавање на некои од правилата при летање.

Ова е сосема спротивна слика од она што можеше да се види за време на авионската несреќа што се случи во Јапонија во јануари годинава, кога патнички авион се судри со помало летало на аеродромот Ханеда во Токио.

Тогаш сите 300 патници беа експресно евакуирани од запаленото летало, без багаж во рацете, и ги слушаа упатствата на персоналот.

Б. С. Б. | Црнобело