Се грижела за него пред смртта, му го посвети најголемиот хит – Фотки од детството на Теја Дора со татко ѝ Драган Павловски

Детали

петок, 10 мај 2024

Секојпат кога ја пее нејзината најпозната песна, чувствува огромна болка, затоа што додека ја пишувала морала да се грижи за болниот татко, кој починал пред 3 години. Што кажа српската претставничка на Евровизија 2024 Теја Дора за односот со татко ѝ Драган Павловски Гандра?

Српската претставничка на Евровизија 2024 Теја Дора е топ тема во балканските медиуми откако успеа да се пласира во финалната вечер што ќе се одржи во сабота (11.05) во Малме, Шведска.

Теја Дора претходно стекна огромна популарност во Србија благодарение на песната „Џанум“ која беше и саундтрак за втората сезона на хит-серијата Južni vetar.

Нејзиното влегување во финале со песната „Рамонда“ изненади многумина, затоа што Теја Дора не котираше високо на евровизиските обложувалници.

Теја Дора не сака премногу да зборува за својот приватен живот и многу повеќе се знае за нејзината мајка Јасна Јојиќ, српска новинарка и антрополог која ја проучувала влашката магија, но познато е дека пејачката била подеднакво блиска и со нејзиниот татко Драган Павловски Гандра.

На Инстаграм деновиве кружат досега невидени фотки на кои Теја Дора е со нејзиниот татко, а од она што го споделила досега со јавноста се знае дека многу тешко ѝ паднала неговата смрт.

Пред настапот на Евровизија, мајка ѝ откри дека таткото на Теја Дора долги години живеел на Кипар, каде што работел како графички дизајнер и уметник, а пејачката во младоста летата ги поминувала таму.

„Додека работев на песната ’Џанум‘, татко ми се разболе, мошне тешко и ненадејно. Тој беше генерално силен и позитивен човек, активен и не очекуваше дека ќе се разболи на начинот на којшто се разболе.

Многу брзо почина. Јас внимавав на него, беше кај мене и го чував во тој период, што беше многу краток. Тоа се случи во тој период, кога ја пишував песната, така што тоа ми беше нешто најтешко што во животот сум го доживеала“ – изјави таа.

Во повеќе наврати вели дека секојпат кога ја пее оваа песна чувствува огромна болка заради загубата.

Инаку, победата на Изборот за песна за Евровизија во Србија, Теја Дора ја посвети на нејзиниот татко кој исто така бил музичар и свирел на гитара.

„Тој беше некој што силно ме поддржуваше во тоа, како и мајка ми, но ние бевме поблиски во смисла на уметноста. Тој свиреше гитара и требало да свири во групата ’Смак‘, но нешто се случило и не дошло до тоа.

Нему му ги праќав сите песни и го прашував за мислење, а неговите совети многу ми помагаа. Секогаш ми зборуваше за емоциите и ми велеше: ’Тоа што ти треба да го направиш со музиката е да шириш љубов и да шириш емоција и да бидеш добар човек‘“ – изјави Теја Дора за српските медиуми.

Доколку Теја Дора нè изненади сите и сепак победи на годинешната Евровизија, јасно е кому ќе му ја посвети оваа победа.

Прочитајте и Која е Теодора Павловска – Девојката што ќе ја претставува Србија на Евровизија?

Б. С. Б. | Црнобело