Жена што произведува чевли со моќна поука: „Не сум доволно богата за да купувам евтини работи“

Детали

сабота, 31 мај 2025

„Имав прекрасно детство и исклучително скромно растење, и една реченица што моите родители постојано ја повторуваа кога купуваа некои поважни работи беше: „Не сум доволно богат/а да купувам евтини работи“ и навистина ми беше нејасна, сè досега...“, вели Ана Поповиќ од Србија. Се согласувате ли?

Ана Поповиќ од Србија има свој мал бизнис за изработка на чевли. Вели дека нејзиниот бренд се родил во Њујорк, а израснал во Белград.

На својот Инстаграм профил, каде има повеќе од 64.000 следбеници, често ги споделува своите изработки, но и забавни приказни од секојдневието.

Сега, таа споделува еден разговор кој ја довел до мудра поука, која многу одамна ја имала слушнато од нејзините родители.

Нејзината објава гласи:

„Имав прекрасно детство и исклучително скромно растење и една реченица што моите родители постојано ја повторуваа кога купуваа некои поважни работи беше:

„Не сум доволно богат/а да купувам евтини работи“.

Тогаш таа реченица не ми беше баш најјасна, но со текот на времето почна да ми одѕвонува во глава секогаш кога ќе изберам квалитет, наместо квантитет.

И ден денес, секогаш се сеќавам на нив и на тоа едноставно правило, кое всушност е лекција за цел живот.

Пред неколку дена бев кај мојот стоматолог Маја, и пред да ви ја раскажам оваа приказна, морам да ви објаснам каква царица е Маја и веднаш да ви кажам дека ова не е платена реклама за стоматолошки услуги!

Целото мое потесно и пошироко семејство оди кај Маја веќе со години поради нејзината неверојатна стручност, но всушност најмногу одиме кај неа затоа што е толку насмеана, позитивна, духовита и неверојатно комуникативна, што секоја посета завршува со смеа до солзи.

Сега, замислете што се случува за време на една класична посета на стоматолог - седите на столчето, и таа ви поставува некое прашање, а вие одговарате само со самогласки затоа што не смеете да ја затворите устата.

Токму во една таква ситуација се случи овој разговор меѓу нас и ви го пренесувам во целост:

Маја: „Леле, Анчи, цело време сакав да те барам да ти кажам – бев минатиот викенд на една свадба и ги носев оние твои црни лакирани чевли, знаеш на кои мислам?“
Јас: „Аха, знам...“

Маја: „Леле, човече, се обидував да се сетам кога точно ги купив и се сетив - ПРЕД ТОЧНО 10 ГОДИНИ!

Се сеќаваш кога беше твојата прва промоција пред да се вратите назад за Америка - купив два пара. Веруваш ли дека чевлите не мрднаа! Сè уште се исти! Лакот е ист, не се ни поместил – неверојатно!“

Јас: „Ах, баш ми е драго!“

Маја, се оддалечува од мене и ме гледа со сериозен поглед:

„Анчи, 10 години траат! Дали е реално?! Човече, па тоа и не е баш добро за твојот бизнис!“

Почнувам да умирам од смеа, затоа што никогаш во животот никој не ми рекол дека квалитетот на моите чевли е всушност ‘проблем’!

Се сетив на фразата од моите родители: „Не сум доволно богат/а да купувам евтини работи“.

Можеби е време оваа реченица повторно почесто да се слуша.

Се согласувате ли со фразата?

С. С. | Црнобело