„Стигнав да се збогувам, му пеев тивко наша песна“ – Дино Мерлин и колегите емотивно се збогуваат од Халид Бешлиќ

Детали

вторник, 07 октомври 2025

Дино Мерлин сподели емотивна објава за последната средба со Халид, една дождлива октомвриска вечер, а Марија Шерифовиќ напиша: „Престана да чука музичкото срце на Босна и Херцеговина. Халиде, нека ви е вечна славата и благодарам за секоја скршена чаша и пуштена солза“. Колегите се збогуваат од Халид Бешлиќ. 

Денес регионот го погоди тажна вест за смртта на босанскиот пејач и легенда на народната музика, Халид Бешлиќ.

Тој почина на 71 година, по борба со сериозни здравствени проблеми,  а последните денови ги минуваше на одделот за онкологија во Сараево.

Зад себе, Халид ја остави својата сопруга Сејда, која наводно исто така е во болница, како и синот кој го има со неа.

Но, она што засекогаш ќе трае е неговото богато музичко наследство и песните кои се пеат низ многу генерации.

Колегите од естрадата се збогуваат од Бешлиќ на социјалните мрежи со емотивни објави:

Дино Мерлин

„Големиот, неповторлив Халид Бешлиќ. Топла душа босанска. Без корист за себе. Стигнав да се збогувам. Дождлива, октомвриска, сараевска ноќ. Му ја пеев тивко нашата песна. Како благо да се насмевна во тој момент. Си мислев: Патувај бела птицо, ти имаш со што пред Господарот. Те сакам многу. Твој Дино“.

Жељко Самарџиќ

„До крајот на животот беше човечка грамада и бескрајно почитуван колега. Спокој на душата! Сочувство до семејството и искрените пријатели“.

Сека Алексиќ

„Патувај со ангелите, драг Халид“.

Марија Шерифовиќ

„Престана да чука музичкото срце на Босна и Херцеговина. Халиде, нека ви е вечна славата и благодарам за секоја скршена чаша и пуштена солза. Искрено сочувство до семејството“.

Илма Карахмет

„Отиде гласот на Босна, но не и неговата песна. Ти благодарам Халид, што беше светло и поддршка на многумина од нас. Твоите ноти засекогаш ќе одѕвонуваат во нашите срца“.

М. М. | Црнобело