„Дневно има и по 400 повици, на телефон одговараат само лекари“ – јутуберката Анастасија (10) сними видео од Брзата помош во Македонија

Детали

среда, 22 март 2023

Од пациенти коишто се јавуваат само за главоболка до сериозни случаи каде што животот навистина е загрозен - тимовите на Итната медицинска помош во Македонија добиваат најразлични повици, а младата јутјуберка Анастасија (10) направи видео во кое откри како функционира оваа мошне битна институција кај нас.

Дали некогаш сте се запрашале како изгледа диспечерскиот центар на Брзата помош, кој ги прима вашите повици и зошто некогаш ви поставуваат многу прашања?

Нашата јутјуберка Анастасија (10) на својот канал објави видео снимено со докторката Маргарета Атанасовска Трипуновска, која е шеф на смена во Итната медицинска помош.

Анастасија е 10-годишно девојче со потекло од Македонија, кое неколку години наназад со своето семејство живее во Германија, но редовно објавува видеа на својот YouTube канал во кои раскажува за богатата историја на нашата земја, но честопати прави и едукативни видеа за тоа како функционираат некои од поважните институции во нашата држава.

Во изјава за CRNOBELO.com, Анастасија ни откри дека за големиот христијански празник Велигден снимила интервју со Џина Папас Џокси, а голема желба ѝ е еден ден да сними видео со претседателот на нашата земја за да им покаже на нејзините следбеници како вообичаено изгледа еден негов работен ден.

Прочитајте и Браво! Анастасија (9) од Скопје живее во Германија и снима едукативни видеа за Македонија, горда на своите корени

Неодамна Анастасија сними видео заедно со тимот на Итната медицинска помош, а на нејзините прашања одговараше докторката Маргарета Атанасовска Трипуновска.

Во ова видео многумина за првпат имаат можност да погледнат како изгледа диспечерски центар на Итната медицинска помош, а докторката појасни како функционира системот во Македонија и што се случува кога луѓето се јавуваат да побараат помош таму.

Граѓаните во Македонија може да побараат помош на два броја, 194 и 112.

Ако се јавите на 194 тоа значи дека директно барате помош во диспечерскиот центар на Итната медицинска помош, додека од 112 се јавуваат во Центарот за управување со кризи, од каде што треба да почекаат да бидат упатени во Итната медицинска помош.

„Бројката на граѓани кои се јавуваат во текот на денот е многу голема. Таа понекогаш се движи од 300 до 400 повици. Потоа од тие повици, ние докторите, затоа што секогаш на линијата 194 седат доктори коишто имаат долгогодишно искуство, имаме одреден број на прашања коишто им ги поставуваме на пациентите за да можеме да дознаеме каква е моменталната состојба на пациентот и за да дознаеме дали се работи за итен случај. Бидејќи Брзата помош е служба, оди само таму каде што е загрозен животот“ – појаснува докторката.

Таа вели дека некогаш има луѓе што се јавуваат само за лекарски совет, па ако имаат време им даваат, а ако не ги упатуваат кон матичните лекари.

„Се јавуваат некогаш и за најбанални работи, ако имаат температура, ако ги боли глава, ако ги боли тело. Значи тоа се секојдневни прашања за коишто бараат совет што да преземат.

Но, секако кај нас се јавуваат и сите оние коишто имаат сообраќајни незгоди, коишто имаат незгоди од пад од висина, или пак болка во градите која што може да биде симптом за посериозна состојба како срцев удар или кои што имаат мозочен удар.

Значи тоа се луѓе коишто не можат сами да отидат во болница и бараат помош на лице место, лекар да ги прегледа“ – појаснува докторката.

Анастасија имаше можност да сними и како изгледа внатрешноста на возилото на Брзата помош и да добие одговори на повеќе прашања поврзани со него.

Погледнете го нејзиното видео во продолжение:

Б. С. Б. | Црнобело