Заедно сме посилни! Кампања против говор на омраза на социјалните мрежи! Александра, Миа и Маја во улога на „Партизанки“
- Детали
- понеделник, 03 април 2023
„ПАРТИЗАНКА“
„Ова не е обична приказна, ова не се обични фотографии, ова е нешто што долго тлее кај мене, кај нас. Кога ги поканив Миа и Александра да бидат дел од кампањата за најновата моја колекција, кога им ја раскажав приказната, без размислување кажаа ДА...“, вели дизајнерката Маја Кикириткова.
„А приказната е ова, борба против говор на омраза, борба против сајбер булинг. И не случајно сме трите овде, не случајно токму ние сакаме да ја пренесеме пораката. Пораката може да ја пренесе тој што ја доживеал, а сите три сме биле жртви на сајбер булинг.
До кога ќе бидеме неми и глуви на темава?! До кога сѐ ќе криеме длабоко во нас, не оставајќи простор јавно да говориме?! До кога оваа тема ќе биде табу тема?! До кога ќе нѐ интересира што ќе каже другиот?! До кога ова нема да биде казниво со закон?! Можам вака до бесконечност со прашањата „ДО КОГА?!“
И ДА, да покренеме заедничка петиција, сите заеднички да се бориме ова да биде казниво со закон!
Името на колекцијата е „Партизанка”, и не случајно е насловена така, бидејќи инспирација е партизанката како жена која се борела за поинакви права. Жена која не била потчинета, жена која облекува панталони и оди во борба. Јака жена, хероина, која знае да крене глас и со пушка во раце да оди во борба.
Со оваа кампања, сакаме да пренесеме една многу битна порака!
Годинава е 15 години постоење од моето творештво, па јубилејот го одбележувам со прогрес и промени за кои не треба да се бориме само ние три, за кои треба да се бориме сите заедно!“
Самата колекција е изработена од лен, во земјени тонови, како најприроден и удобен материјал, со златен премаз по основата кој му дава еден лукс момент. Беџовите прикачени на самата облека се преземени од тој војнички стил.
Партизанските капчиња ја надополнуваат целата приказна. Колекцијата е составена од кошули, панталони, здолништа, елеци, фустани…
Фото: Стефан Соколовски, BadStef
Би можело да ве интересира:
Препорачуваме
Најчитани неделава
