Лила објави фотка од болница половина час пред операцијата за рак на дојката: „Не се плашев, едвај чекав да се случи и да го продолжам патот на излекување“

Детали

недела, 09 април 2023

Насмеана, ведра, расположена и подготвена да го живее животот со полни гради – вака изгледа Лила Филиповска на фотографијата што ја сподели на Инстаграм, а која е направена во болничката соба во Турција половина час пред да почне операцијата на рак на дојката.

Еден месец откако Лила Филиповска првпат јавно кажа дека имала рак на дојката и сподели како го поминала најтешкиот период во животот, таа сега објави нова фотографија на Инстаграм со која се потсети што се случувало половина час пред да почне операцијата.

Моќната фотографија повторно предизвика воодушевување кај следбениците на Лила, кои ѝ коментираат дека е силна жена и дека им е инспирација на многу други дами со својот позитивен став.

„Кој би рекол дека животот ќе ми се дели на ‘пред’ и ‘после’ оваа слика! Слика направена половина час пред мојата петчасовна операција на канцер на дојка. Сосема спонтано направена од мојата другарка, a сега сосема случајно пронајдена во мојот албум со слики.

И да… оваа насмевка е искрена и многу зборува. Зборува за тоа дека воопшто не се плашев и не траоризирав. Зборува за тоа дека едвај чекав да се случи и да го продолжам патот на излекување! Добро прочитавте: Не патот на лекување туку на излекување.

Зборува за мојата решеност да го издржам и ова патешествие не баре сум тргнала да снимам уште една од моите емисии!“, почнува пораката на Лила.

Познатата водителка вели дека денот кога се оперирала бил студен, но имало сонце и таа тоа го сфатила како позитивен знак.

„А денот студен, зимски ама сончев. Го сфатив тоа како добар знак. И беше!!!

Без разлика на тоа што ноќта по операцијата бев во вистинска агонија, без разлика што проклетникoт пуштил пипци и по лимфните јазли под пазувите, и што имав закачено три дрена.

Кога хирург како др Фатих Ајдован ќе ти каже дека ќе биде се во ред, едноставно знаеш дека треба да му веруваш“, продолжува таа.

Лила вели и дека има уште многу да пишува, ама нема да го направи сето тоа одеднаш.

„А пишувам само заради Вас кои ја биете истата битка. Првиот чекор до победата е верувањето дека ќе победите! Без него нема да стигнете до вториот.

Никој не вика дека ќе биде лесно ама не заборавајте: светот ги памти само победниците“.

Лила минатиот месец првпат јавно кажа дека имала операција од рак на дојката и низ каква голгота поминала изминатата година откако лекарите ѝ ја дијагностицирале болеста.

Таа неодамна беше гостинка на настан во хотелот „Александар Палас“, на српската хуманитарка и инфлуенсерка Ана Дорник, која исто така го победила ракот. И тогаш Лила говореше за болеста и откри дека во текот на целото лекување плачела само два пати. 

Прочитајте и Првиот емотивен говор на Лила Филиповска за борбата со ракот: „Плачев само двапати, периодот на дијагноза ми беше најтежок“

А. Ј. | Црнобело