Снешка од Скопје ги пофали своите соседи во Германија: „Соседите тука ти ги собираат алиштата од жица ако заврне“

Детали

петок, 16 јуни 2023

„Си ги најдов алиштата здиплени во корпа и оставени покрај скали. Со соседите секогаш така си оставаме покрај скали, си се 'тинтраме' без да си пречиме“, Снешка Трајковска на Фејсбук сподели една приказна што ќе ве натера да размислите што значи да имате добри соседи кои се секогаш тука за да ви помогнат.

На колкумина од вас ви се случило соседите само да ве гледаат додека се мачите нешто да направите и не сакаат да ви помогнат? Иако Германците важат за мошне студен народ, Снешка Трајковска која неколку години живее во гратчето Моерс дава сосема поинаква слика за животот таму.

Во таа насока оди и нејзината објава на Фејсбук страната, Огнените ѕверови на Дамјана, каде што сподели фотографија од нејзиното дворче, но и раскажа една случка за тоа како соседите се тука за да ѝ помогнат и ги „рушат“ стереотипите за тоа дека на Запад луѓето се студени и живеат изолиран живот без кафе-муабети и дружење со соседите.

Оваа приказна се случила на почетокот по преселбата, додека сѐ уште Снешка и семејството живееле во куќата под кирија, пред да си купат стан, но тоа што го раскажува ќе ве натера да размислите дека некогаш и најмалите гестови може да значат многу за луѓето околу нас.

„Oва е дворчето во нашата нова дома, во новата земја далеку од старата дома. поглед од кујна утрово. врнежливо.

Го гледате дворчето?

А алиштата за сушење што се ставени?

Не гледате алишта?!?

Е па, не гледам ни јас, а ги ставив вчера да се сушат. Срипав сабајле во 5 часот да ги прибирам кога слушнав дека врне, го видов ова на фотографијава и си се пикнав пак во кревет да се доспијам.

Си ги најдов алиштата здиплени во корпа и оставени покрај скали. Со соседите секогаш така си оставаме покрај скали, си се 'тинтраме' без да си пречиме.

Им ја вратив корпата со чоколадо во неа.

Вчера си поседовме со соседот во двор. Си правевме муабет со Google Translate. Супер беше. Тој знае англиски, колку јас што знам германски. Нека е благословен Google Translate, ама се згазивме од смеење.

Не е до зборовите, до меракот за дружба е и чистата мисла.

Ме праша дали сме среќни тука со нив.

Си кажав што одамна си чувствував: ‘Да, многу сме среќни. Како дома сме’.

Дома е таму кај што соседите ти ги прибираат алиштата“ – вели за крај Снешка.

 

Да, навистина е така, Убаво е кога знаеш дека околу тебе секогаш имаш соседи и луѓе што секогаш ќе бидат тука за да ти помогнат, но и со кои можеш да го поминеш слободното време во смеење и дружба.

Инаку, Снешка во интервју за CRNOBELO.com зборуваше за преселбата во Моерс и за тоа како изгледа нивниот живот таму.

Целото интервју со Снешка можете да го проследите ТУКА.

Б. С. Б. | Црнобело