Бајковито запросување на Македонка во Париз со поглед на Ајфеловата кула - двајцата се од Ресен, тој живее во Данска, таа во САД

Детали

среда, 12 јули 2023

Костадин и Ерика се од Ресен, но животот ги однел на различни страни – неа во Америка, а него во Данска. Откако пред неколку години повторно се сретнале, почнале врска, која наскоро ќе ја крунисаат со брак.

Костадин (26) од Ресен по 4 и пол години врска ја побара за сопруга Ерика (23) од Ресен во еден од најромантичните градови на светот – Париз.

Тој ѝ подготви романтично запросување покрај брегот на реката Сена, додека во позадина трепкаа светилките на Ајфеловата кула.

Костадин и Ерика се од ист град, но животот ги однел на различни страни – неа во Америка, а него во Данска.

Откако пред неколку години повторно се сретнале, почнале врска, која наскоро ќе ја крунисаат со брак.

Нивната љубовна приказна за CRNOBELO.com ни ја раскажа Костадин:

„Двајцата сме од Ресен, но јас живеам во Данска, а таа во Америка. Се запознавме многу одамна, уште кога двајцата живеевме во Ресен.

По неколку години повторно се сретнавме, кога во исто време и двајцата бевме на одмор во Ресен.

Почнавме да се дружиме како пријатели и тоа полека напредуваше во значајна врска.

Оттогаш поминаа околу 4 и пол години, а ние уживаме во љубовта.

Јас повеќе од 2 месеца се подготвував да ја прашам да се омажи за мене.

Подготовките за запросувањето ги направив заедно со фотограф од Париз, кој ми помогна за сè да изгледа магично.

Таа беше изненадена и навистина среќна поради предлогот.

А го избрав Париз затоа што е нејзиниот омилен град и отсекогаш сакала да го посети градот на љубовта. 

Кога клекнав на колена и ја побарав за сопруга, имаше многу луѓе кои ни аплаудираа и ни честитаа“.

А. Ј. | Црнобело