Психолошка поддршка и советување за учениците од „Песталоци“ по убиството на Вања Ѓорчевска

Детали

понеделник, 04 декември 2023

Децата, родителите и наставниците во наредниот период ќе можат непосредно да разговараат со психолозите кои се во училиштето за да им дадат поддршка во справувањето со болката, тагата, стравот и измешаните емоции.

Еден ден откако во јавноста се дозна за убиството на 14-годишната Вања Ѓорчевска, која беше 9-то одделение во ООУ „Јохан Хајнрих Песталоци“, од училиштето најавија советување и психолошка поддршка за учениците.

На нивната Фејсбук страница тие најавија дека во наредниот период не само учениците, туку и нивните родители ќе може да разговараат со стручни лица за тоа како да се справат со емоциите.

„Во овие тешки мигови, кога тагуваме по Вања, сакаме да потенцираме дека училиштето е безбедно место во кое децата можат да добијат психолошка поддршка и советување.

Денеска се одржа редовна настава за учениците од прво до петто одделение, додека со учениците од шесто до деветто одделение работеа одделенските раководители со цел да им се даде поддршка и помош во справувањето со болката, тагата, стравот и измешаните емоции.

Децата, родителите и наставниците и во наредниот период ќе можат непосредно да разговараат со психолозите кои се во училиштето за да им дадат поддршка.

Во целиот процес се вклучени и надворешни стручни лица, психолози и психијатри, со цел да им се помогне на учениците, но и на родителите, да се соочат со траумата и да го сочуваат менталното здравје“, велат од училиштето.

Таму денес беше отворена и книга на жалост во чест на Вања.

А. Ј. | Црнобело