Јелена Спенџарска: „Ние Македонците сфаќаме што е слобода откако ќе заминеме во странство“

Детали

среда, 31 јануари 2024

„Јас лично мислев дека нешто не е океј со мене. Барав грешка во себе, мислев дека премногу барам, имам високи стандарди, многу се занесувам. А всушност проблемот цело време беше и сè уште е ова затворено општество во кое ни минува животот. Не е до тебе, нема ништо погрешно со тебе“, напиша Спенџарска во објава на Инстаграм Стори.

Водителката и инфлуенсерка Јелена Спенџарска, преку својот Инстаграм им се обрати на сите оние кои се чувствуваат како да се гушат во земјава и кои секогаш во себе ја бараат грешката за проблемите, исплашени да сменат нешто од страв што ќе каже околината.

Јелена, која веќе извесно време живее на релација Скопје - Солун, на Инстаграм Стори објави краток текст, нејзино размислување за тоа што го доживеала откако живее надвор од Македонија и како конечно се чувствува слободна, без стеги од општеството.

„Само нафрлени мисли.. 

Многу луѓе кај нас мислат дека се слободни и живеат слободен живот. И потоа, поради Х причини ќе заминат некаде во странство, на недела или година, сеедно, и ќе сфатат дека идејата која ја имале за слободен живот - врска нема. 

Да, немаме војни, имаме слобода на движење, но сега зборувам за ментална слобода.

Слобода да се запишеш на факултетот што ти го сакаш, а не твоите, слобода да го оставиш партнерот едноставно дека не сте среќни веќе, да се разведеш без разлика што ќе каже околината или дека извесен период ќе ти трпи џебот да дадеш отказ затоа што нема ни ‘П’ од потенцијал таму и не сакаш да бидеш робот, да отидеш во трговски и да си купиш поскапо парче облека без да се броиш дали ќе ти стигнат пари месецот, да си кажеш свое искрено мислење без страв дека ќе те каменуваат ако не е исто како со останатите... листата е стварно долга.

Ова го пишувам дека јас лично мислев дека нешто не е океј со мене кога се соочував со сè што напишав.

Барав грешка во себе, мислев дека премногу барам, имам високи стандарди, многу се занесувам. А всушност проблемот цело време беше и сè уште е ова затворено општество во кое ни минува животот.

Не е до тебе, нема ништо погрешно со тебе.

Мене ми требаше многу време да го сфатам ова, затоа, од душа најискрено ти го кажувам и тебе, во случај да се чувствуваш изгубено“, напиша таа.

А. Ј. | Црнобело