Запросување на Македонка во Тајланд: „Тајно замина да купи прстен и кога се врати во ресторанот - ме запроси“

Детали

среда, 13 март 2024

„Кристијан набрзина пребарал златари во близина на ресторанот додека бевме излезени со пријатели и го искористил моментот додека јас не бев присутна на масата да отиде по прстен заедно со сопругот на мојата другарка“, раскажа Тамара од Македонски Брод за запросувањето во Бангкок.

Кристијан Мицев (27) и Тамара Јовановска (26) од Македонски брод неодамна беа на патување во Тајланд, каде што Кристијан ја побара Тамара за сопруга.

Запросувањето, вели Тамара, не му било планирано, туку додека уживале во ресторан со преубав поглед на Бангкок и романтична атмосфера, Кристијан решил дека тоа е вистинскиот момент да клекне на колено пред својата девојка.

За неочекуваното запросување, без однапред направен план и изненадувањето што го доживеала, Тамара раскажа за CRNOBELO.com:

„Кристијан е од Радовиш и работи во семејна транспортна фирма, а јас сум од Македонски Брод, а имам свој салон за убавина во Скопје.

Заедно сме повеќе од 6 години, а се запознавме уште кога јас имав 19, а Кристијан 20 години. На почетокот бевме во Скопје и двајцата, додека студиравме. Јас студирав Графички дизајн, а Кристијан туризам.

Уште на почетокот делевме исти мислења, амбиции, уживавме во исти работи, правевме сè заедно и нешто што отсекогаш го сакавме и ќе го сакаме е патувањето, без разлика дали е далечно или во Европа.

Постојано патуваме и токму поради ова најмалку очекував дека ќе има запросување во Тајланд. Кристијан немал воопшто план да ме запроси.

Но, во последните два дена од патувањето го посетивме Бангкок. 

Вечерта пред нашиот лет за назад решивме да ја поминеме во Spectrum Rooftop. Таму бевме заедно со наши пријатели. Атмосферата беше магична, погледот прекрасен, збогатен со музика во живо, одлична храна и друштво.

Не поминал ни еден час за Кристијан да сфати дека е тоа е вистински момент за запросување. Тајно ја контактирал мојата најдобра другарка и нејзиниот сопруг и ги известил за неговиот план.

Кристијан набрзина пребарал златари во близина на ресторанот и го искористил моментот додека јас не бев присутна на масата да отиде по прстен заедно со сопругот на мојата другарка.

Таа, пак, имаше цврст изговор зошто ги нема. Во последен момент пред затворање успеале да стигнат до една златара, а асистентката за продажба била фина и коректна, ги примила и веднаш им ги понудила свршеничките прстени.

Тие се вратија назад во ресторанот околу 21:30 часот. Воопшто не се посомневав сè додека пејачот не почна да ми се приближува и да ми ја пее песната All Оf Me од Џон Леџенд, а целиот персонал да доаѓа накај нас со прскалки во рацете.

На момент ми беше нејасно, сè додека не го видов Кристијан на колено пред мене со кутија и прстен во рацете. Во секундата имав мал шок на измешани позитивни емоции, но нормално, ја прифатив неговата понуда за брак. Бев пресреќна.

Чувството не може да се опише со зборови онака како што се доживува. Емотивен и посебен момент за нас!

©CRNOBELO.com Забрането преземање и копирање. Крадењето на авторски текстови е казниво со закон. 

А. Ј. | Црнобело