Славчо Попоски, метеоролог: „По екстремно високите температури, од недела силно невреме со пороен дожд“

Детали

четврток, 20 јуни 2024

„Температурите од денес па сè до недела ќе надминуваат 30 степени, меѓутоа во недела ќе има нестабилна облачност со пороен дожд, грмежи и засилен ветер“, вели Славчо Попоски.

Екстремно високите температури „нè измачуваат“ веќе неколку денови и ќе треба да го трпиме жешкото време уште некој период.

Но, веќе од недела, покрај намалувањето на температурите, можно е да се соочиме со силно невреме и поројни дождови.

Во продолжение, прогнозата на Славчо Попоски:

„До недела, нашата територија ќе се наоѓа под влијание на веќе споменатиот екстремно топол бран кој продира од северните предели на Африка кон нашата територија, но и на територијата на целиот регион.

Температурите насекаде во Македонија од денес, па сè до недела ќе надминуваат 30 степени, додека во поголем дел од државава тие ќе се искачат и до околу 35 степени.

Во најтоплите централни и југоисточни предели, како и во Скопската Котлина, локално тие ќе надминуваат и 40 степени.

УВ индексот ќе има екстремно висока вредност и ќе биде со коефициент некаде помеѓу 9 и 10, па поради ова апелираме граѓаните без потреба да не излегуваат во најтоплиот дел од денот, односно од 11 до 17 часот, но и да пијат повеќе течности.

Меѓутоа, веќе во недела во Македонија, и тоа поради влијание на висински циклон кој ќе биде со центар над Средоземјето, во попладневните и во вечерните часови атмосферата позначително ќе се дестабилизира, па така на повеќе места ќе има развој на нестабилна облачност проследена со пороен дожд, грмежи и со засилен ветер.

Поради големата енергија во атмосферата, и тоа токму поради повеќедневниот екстремно топол бран од Африка, локално се очекува појава на силно невреме со обилен пороен дожд, силни грмежи и електрични празнења, силен ветер како и појава на град кој во ваква ситуација големи се условите тој да биде и крупен.

Дури постои опасност од појава на суперќелиски облаци како во Македонија, така и во регионот за време на викендот кој доаѓа.

Ваквите суперќелии би можеле да предизвикаат дури и појава на торнадо или, пак, да предизвикаат штети во одредени области“.

Спирова С. | Црнобело

фото: Фејсбук, freepik.com