Двајца Македонци го запознаа Лук од Emily in Paris: „Во реалноста е уште пошармантен“

Детали

четврток, 26 септември 2024

Македонскиот фотограф Стефан Соколовски и нашиот оперски пејач Иван Наумовски, на два различни дела од светот, неодамна го запознаа шармантниот Лук од серијата Emily in Paris и за CRNOBELO.com раскажаа за своите средби со него.

Серијата Emily in Paris веќе неколку години е еден од најголемите хитови на Нетфликс, а меѓу омилените ликови е Лук - чудниот, но допадлив Французин кој освојува со својот шарм и наивна искреност.

Токму него, актерот Бруно Гуери, кој го глуми Лук, во текот на летото го запознаа двајца Македонци - фотографот со интернационална кариера Стефан Соколовски и оперскиот пејач и професор Иван Наумовски.

Стефан (познат како BadStef) се сретна со Лук во Милано на средината на летово, а Иван се фотографираше со Гуери во Њујорк пред неколку дена, на аеродромот JFK.

Сега, за CRNOBELO.com, тие раскажаа за своите кратки средби со францускиот актер и впечатокот што им го оставил.

И иако го сретнале во различно време и на различни локации, и Иван и Стефан се согласуваат во едно - дека Бруно Гуери во реалноста е уште пошармантен отколку во серијата.

Стефан го сретнал Гуери во Милано, каде што последниве години патува често поради работата и бројните фотосесии за познати брендови и модни дизајнери.

За својата средба со Лук, Стефан вели:

„Бев на состанок со агентка од позната модна агенција во мојот омилен локал и хотел Portrait Milano, за да договориме нова соработка за фотосесии за време на Модната недела во Милано оваа есен. На масата до нас седеше Лук.

На прва не го препознав, но пред излегување сфатив дека е тој.

Веднаш му пристапив и му кажав дека едвај ја чекам новата сезона на Emily in Paris (во тоа време имаше само најави за премиерата во август 2024) и му кажав дека е еден од моите омилени ликови во серијата бидејќи е многу специфичен.

Тој беше многу пријателски настроен, ми се заблагодари за вниманието и кажа дека имаат снимено одлични нови епизоди.

Интересно беше што откако се фотографирав со него, луѓето кои седеа во близина почнаа да стануваат, па и тие го прашуваа дали ќе сака да се фотка со нив, бидејќи сфатија кој е“.

Иван, пак, го сретна актерот на аеродром во Њујорк. Оперскиот пејач во САД одржа концерт пред тамошната публика, заедно со пијанистката Ана Гацева, а ги придружуваше и композиторката Дарија Андоновска.

По 10 дена поминати во „Големото јаболко“, додека го чекал својот авионски лет, Иван случајно го сретнал Гуери во една од аеродромските продавнички.

За својата средба, тој раскажува:

„После 10 дена поминати во Њујорк, време беше да се вратиме назад. Првите 3 дена ни поминаа во шетање и проби, односно подготовка за концертот, а потоа имавме уште 7 дена во кои ни се отвори нова врата од задоволства за малку поубаво да се запознаеме со Њујорк.

Сите викаат дека таму може да се сретнат многу интересни ликови на улица, па дури и познатите од Холивуд.

Јас не сретнав некоја светска ѕвезда низ улиците, но со моите колешки, кога ја поминавме пасошката контрола, прво што направивме беше прошетка низ терминалот на аеродромот и мал шопинг, зашто имавме 3 часа чекање пред полетувањето.

Се разделивме, а јас влегов во една навидум ‘скромна’ продавничка со малку артикли. Со мене истовремено влезе еден тенок човек со разбушавена седа коса, но мошне елегантно дотеран и со едно скапо куферче.

Се помислив неколку секунди од каде го знам уствари човекот, кога еден постар маж покрај мене го впери прстот кон него и ѝ покажа на сопругата: „Види, глумецот од онаа серијата, Emily in Paris“.

Тука веќе ми беше сè јасно. Сакав да бидам учтив и се доближив да го прашам дали е можеби тој актерот, иако беше јасно дека е тој.

Се насмевна и тука веќе ептен заличи на Лук. Му дадов комплимент за одличната работа која ја прави во серијалот и го прашав дали е во ред да се сликаме.

По прашањето уште повеќе се насмевна и рече: „Секако“.

И така, покрај десетте нереални дена поминати во Њујорк со успешен концерт, сега имам уште една интересна приказна за споделување - овој пат од терминалот 1 на аеродромот JFK, со Лук од Emily in Paris“.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело