Приказна од Македонија: Од предвремено родено бебе од 950g, денес е доктор кој им помага на предвремено родени бебиња

Детали

понеделник, 18 ноември 2024

„Jас сум едно од предвреме родените деца (роден во 29-тата гестациска недела со 950g родилна тежина) и завршив медицински факултет“, вели доцент д-р Игор Исјановски, кој денес со нежност прв ги прегледува очињата на предвреме родените бебиња.

Универзитетска Клиника за Гинекологија и Акушерство вчера (17.11) со неколку емотивни објави го одбележи денот на предвреме родените бебиња, а една од најемотивните беше онаа за доцент д-р Игор Исјановски.

Од предвреме родено бебе во 29-тата гестациска недела со 950g родилна тежина, тој денес е доктор офталмолог, кој ги прегледува очињата на предвремено родените бебиња.

Инспиративната приказна за д-р Игор Исјановски:

„Доцент д-р Игор Исјановски е уште едно дете јунак кое пораснало на нашата клиника, но и понатаму останува јунак за сите идни бебиња родени на нашата клиника.

Доц. д-р Игор со својата специјалност на офталмолог, е задолжен прв да го погледне сиот свет во тие мали бистри очиња на овие предвремено родени бебиња.

Како пациент роден на Клиниката за гинекологија и акушерство тој не ги прегледува само овие дечиња, туку им приоѓа со нежност, им зборува со кроткост, ги гледа со восхит. Не постои емоција која не ја доживеал и искажал.

Кога професијата ќе се наметне сама, кога професијата е повеќе од образование и работа, кога професијата не те дефинира како човек, туку човечкото во тебе ти ја дефинирало професијата...

Му благодариме на доц. д-р Игор кој често нè посетува, кој сите мали очиња ни ги проверува, кој ги храбри и родителите и кој ги третира недоносените.

Доц. Д-р Игор е пример и поттик за сите бебиња и сите родители и дека силата не е во мускулите, дека грижата не треба да нè блокира, туку напротив стимулира“.

Тој вели:

„17-ти ноември ден на предвреме родените деца. Јас сум едно од тие деца (роден во 29-тата гестациска недела со 950g родилна тежина) и завршив медицински факултет, магистрирав, специјализирав, докторирав и работам на превенција, рано откривање и лекување на прематурната ретинопатија“.

С. С. | Црнобело