„Човек со срце планина“ - Доктор Владимир Чадиковски објави емотивно видео за напуштените дечиња во Центарот во Битола

Детали

петок, 10 октомври 2025

„Во Битола постои едно место каде љубовта не е збор, туку секојдневие – Центарот за доенчиња и деца без родители е дом на најсилните срца што сум ги сретнал во животот...“, вели доктор Владимир Чадиковски и открива дека некои од нив ги оперирал со тешки срцеви мани, но дека тие сега се здрави деца.

Детскиот кардиохирург, д-р Владимир Чадиковски, кој години наназад е вистински херој за многу родители, оперирајќи срца на преку 1.500 бебиња и мали деца и грижејќи се за секое од нив, преку објава на Инстаграм трогнува уште повеќе.

Тој сними видео, во рамките на неговиот подкаст, за Центарот за напуштени доенчиња и деца во Битола, го пофали тимот кој работи таму, дека се вистински херои од реалноста, но и откри дека врши операции на срца на сите дечиња од овој дом кои имаат потреба.

Неговата хуманост нема граници, а од неговата мисија треба да учат и другите.

Доктор Владимир Чадиковски вели:

„Во Битола постои едно место каде љубовта не е збор, туку секојдневие – Центарот за доенчиња и деца без родители е дом на најсилните срца што сум ги сретнал во животот.

Верувајте, енергијата е посебна. Моќна.

Овие деца, иако се оставени од светот, никогаш не се сами.

Зад нив стои тим од луѓе со огромна душа. Луѓе кои не работат само секојдневна работа, туку една животна мисија. Тие им се семејство, поддршка, љубов и надеж.

Некои ги опериравме со тешки срцеви мани и тие сега се здрави деца, а нивната храброст е поголема од секоја болка.

И кога ќе ги видите насмевките на овие мали херои, ќе разберете дека вистинската сила не е во мускулите, туку во срцето.

Верувајте, луѓето од овој тим се хероите на нашата држава. Огромна благодарност!“

Кликнете на видеото:

С. С. | Црнобело