Лабина Митевска со моќен говор по добиена филмска награда во Швајцарија: „Се докажавме во балканското мачо општество“

Детали

вторник, 10 декември 2024

„Пред 25 години, долго време бев единствената жена продуцентка, а сестра ми беше единствената жена режисер во нашата мала, но убава земја Македонија. Ни требаа години и години да се докажеме во балканското мачо општество“, кажа Лабина, а наградата ја посвети на починатиот татко.

Нашата актерка и продуцентка, Лабина Митевска, е првата Македонка која ја доби наградата за меѓународна копродукција на европскиот фестивал за филмски награди Eurimages, за нејзиниот исклучителен придонес во филмската копродукција.

Таа, заедно со сестра си Теона, и нивниот брат Вук, е основач на продуцентската куќа Sisters and Brother Mitevski Production.

Лабина, на доделувањето на наградата, на гостите (меѓу кои беа и славните актери Изабела Роселини, Жилиет Бинош и Рејф Фајнс) најпрво им се обрати на македонски јазик, а потоа одржа моќен говор со кој се заблагодари за признанието, но и раскажа за состојбата во македонската филмска продукција, каде што таа, нејзината сестра и брат творат околу 25 години.

Лабина ја доби наградата од шведската актерка Наоми Рапас, која глуми во новиот филм на Теона Митевска, „Мајка“.

Во говорот, Лабина кажа:

„Многу ретко можам да зборувам на македонски јазик, ви благодарам поради ова. Вистинска чест е што ја добивам оваа награда. Благодарност до Европската филмска академија, до Eurimages, до Советот на Европа.

Знаете дека без вас европскиот филм денес ќе беше многу поинаков.

Пред 25 години, кога ја формиравме нашата компанија, долго време бев единствената жена продуцентка, а сестра ми беше единствената жена режисер во нашата мала, но убава земја Македонија.

Ни требаа години и години да се докажеме во балканското мачо општество. Бевме жени и сакавме промена.

Сакавме да докажеме дека филмот не е единствено и ексклузивно за машки филмски професионалци.

Сакавме да правиме европски копродукции со вклучување повеќе жени и најважно, сакавме да правиме бескомпромисни филмови.

Не беше лесно и сè уште не е лесно. Но ние, сестра ми, брат ми и јас, верувавме дека уметноста, дека филмот ќе го промени светот.

И денес веруваме дека филмот ќе го промени светот, ќе ни даде друга перспектива на светот.

За жал, светот во кој живееме денес е сѐ потажен и потажен. Живееме во свет полн со војни, насилство, неправди, нетолеранција.

Светот во кој живееме денес го лажат неодговорни политичари кои постојано создаваат бегалци, имиграциски кризи.

Денес сме сведоци на национализам, расизам и алчен експлоататорски капитализам.

Во светот во кој живееме денес има многу земји со опресивни режими, каде што луѓето не можат да зборуваат слободно или да создаваат слободно.

фото: Фејсбук

И тука сме ние, филмските работници, раскажувачи на приказни, поети со обврска.

Имам чувство и знам дека на светот не му требале толку многу, како сега, раскажувачи со храброст, кои се бестрашни, водени од потребата да ги раскажат своите приказни.

Затоа, вечерва ќе го слават тој вид на филмови.

Ќе го славам и татко ми кој почина пред 2 месеца, а кој нè научи да имаме страст за филмот кој ќе го смени светот“.

фото: Фејсбук

Погледнете го видеото од говорот на Лабина:

А. Ј. | Црнобело