Браво! Мотоциклистот Христијан Бузалковски со донации собра 1.000 пакетчиња за деца од ранливите категории

Детали

среда, 01 јануари 2025

„Оваа година заедно со отец Методијa собравме околу 1.000 пакетчиња, што е 4 пати повеќе од минатата! Навистина сме многу позитивно изненадени од хуманоста на граѓаните“, вели европскиот шампион во мотоциклизам Христијан Бузалковски.

Македонскиот мотоциклист Христијан Бузалковски, четврта година по ред, пред новогодишните празници организира хуманитарна акција во која собира донации - пакетчиња за децата од најранливите семејства.

Откако кон средината на декември преку социјалните мрежи ги повика сите што сакаат да донираат за децата, тој успеа да собере околу 1000 пакетчиња, кои ќе им донесат радост на 1.000 дечиња.

Христијан акцијата за собирање пакетчиња ја организира заедно со отец Методија од црквата Св. Петар и Павле во Скопје.

Бузалковски, кој е третопласиран на FIM Europе и трикратен европски шампион во БМУ категорија, за CRNOBELO.com вели дека и самиот е изненаден од бројот на донации, бидејќи лани со отецот собрале околу 250 пакетчиња, а годинава очекувале тој број да стигне докај 400-500, но не 1.000.

Христијан е пресреќен што толку многу деца ќе добијат барем по едно пакетче, па ова му е поттик и в година да продолжи со идејата што ја започна во 2021-ва.

„Идејата за оваа акција дојде сосема случајно.

Започна како една мала акција со собирање симболичен број на пакетчиња за децата кои немаат, но од година во година, заедно со отец Методија, а и благодарение на сите хумани граѓани, бројката се зголемуваше.

Оваа година успеавме да собереме околу 1.000 пакетчиња, што е 4 пати повеќе од минатата!

Навистина сме многу позитивно изненадени од одзивот и хуманоста на сите граѓани кои се вклучија во оваа акција.

Дел од оние кои донираа ги носеа пакетчињата кај мене, дел ги земав јас, ако некој не можеше да ни ги достави, а дел ги оставаа во црквата кај отецот.

Пакетчињата ќе се донираат на различни места, а поголемиот дел се за деца од ранливи категории.

Еден дел веќе ги поделиме и се надеваме дека ќе успееме да ги поделиме сите до божиќните празници, затоа што се навистина многу и бараат добра организација.

Не можам да кажам дека се гордееме со ова што го правиме, но ќе кажам дека сме многу среќни што знаеме дека оваа акција зема сè поголем одзив на хуманите луѓе кои сакаат вистински да помогнат“.

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело