Браво! Македонската балерина Роксан Стојанов именувана за нова ѕвезда на Париската опера - блеска со полн сјај 

Детали

четврток, 02 јануари 2025

„Солзи, благодарност, исполнетост, гордост... не можам да опишам што чувствувам оваа вечер, нема да ја заборавам никогаш – благодарам на сите“ – напиша македонската балерина, која по изведбата на „Пакита“, ја доби престижната титула во Париската опера.

Нова ѕвезда заблеска во Париската опера – нашата балерина Роксан Стојанов доби престижна титула на крајот од декември 2024.

По изведбата на „Пакита“ од Пјер Лакот, каде таа ја имаше главната улога, балерината беше изненадена со неочекувано признание.

На предлог на Жозе Мартинез, директор за танц и Александер Неф, генерален директор на Операта, Роксан Стојанов беше именувана за „ѕвезда-танчарка на Париската Опера“.

Роксан е родена во Македонија во 1995-та, започнала да се занимава со балет уште во родната земја на 8-годишна возраст, пред да се пресели во Брисел, а подоцна, во 2007-ма се вклучила во училиштето по танци на Париската национална опера.

Во 2022 таа била промовирана во „главна танчарка“, а сега, според француските медиуми, таа стана 9-та „ѕвезда-танчарка“ на престижниот женски тим.

„Независно колку се надеваш дека ќе ја добиеш титулата, никогаш не знаеш кога ќе се случи и дали воопшто ќе се случи, беше вистинско изненадување, пресреќна бев“ – изјавила таа два дена подоцна.

На својот Инстаграм профил, балерината објави неколку фотографии од моментот на доделувањето на признанието и од изведбата на балетот.

Прочитајте дел од емотивната објава:  

„Ми недостасуваат зборови за да ги опишам емоциите кои минуваат низ мене од оваа вечер на 28-ми декември.

Изненадување, солзи, радост, благодарност, љубов, соништа, исполнетост, гордост... неописливо е, но ова беше вечер која нема да ја заборавам. Ви благодарам на сите пораки за поддршка и честитки.

Преплавена сум со љубов. Голема благодарност до г-дин Жозе Маринез и Александер Ниф за ова прекрасно изненадување и признание. Чест ми е што ја имам оваа титула и што ја претставувам Куќата на Париската опера.

Им благодарам на сите од ова друштво, на танчарите кои беа на сцена со мене, на сите кои се вклучени во процесот, како и на мојот партнер. Ти благодарам за ова шоу и сите овие недели полни со работа, секогаш се грижеше за мене и вечерва беше вистински џентлмен, уживав што ја делев сцената со тебе.

Им благодарам и на сите мои учители по балет во Македонија, Белгија, како и на оние од Париската опера.

И морам да се заблагодарам на моето семејство што секогаш ме поддржува, на моите сестри, мојата мајка (најсреќната жена на светот вечерва), на мојот татко кој ме гледаше од ѕвездите и моите пријатели. Златни луѓе сте“.

М. М. | Црнобело