„Низ прстен те гледам, в срце да ти влезам“ - Лилјана и Јован се венчаа на Галичка свадба 2025 (видео)

Детали

недела, 13 јули 2025

Со преку 30 обичаи кои се пренесуваат од колено на колено, Лилјана Михајлоска (25) и Јован Филипоски (27) од Гостивар се венчаа на годинешната Галичка свадба.

Гостиварчаните Лилјана Михајлоска и Јован Филипоски беа младениците на традиционалната Галичка свадба, што викендов се одржува во прекрасното село Галичник.

Во придружба на семејствата, пријателите, но и неколку стотина статисти во носии, за сè на свадбата да делува автентично, како во минатото, тие си го кажаа судбоносното „ДА“ во црквата Св. Петар и Павле средсело, и се заколнаа на вечна љубов.

Оваа година младоженецот има галичко потекло, и како што невестата откри претходно во интервју за CRNOBELO.com, тој отсекогаш имал желба да направи свадба токму таму.

И зетот и невестата претходно учествувале на свадбата како статисти - Јован многупати, уште од мал, а Лилјана само еднаш, во 2022-ра.

Но, годинава, таа ги научи сите обичаи, и заедно со својот избраник, ја продолжија децениската традиција, која е инспирирана од желбата на жителите на Галичник да ги сочуваат обичаите на Мијаците од заборав.

Дводневните свадбени активности почнаа вчера (12.07) со поставување на свадбарскиот бајрак, неговото китење и симболичниот чин на „фрлање“ три пушки од куќата на зетот.

Зетот и неговото семејството ги пречекаа тапаните и заедно заминаа на мостот во селото, каде што свекрвата го поведе свекрвиното оро.

Потоа, пред селската чешма во Галичник, се играа „Невестинско“ и „Тешкото“, ора кои се симбол на пркосот и непокорот.

Свадбените обичаи вчера завршија со одењето по вода, кога невестата заедно со свадбарите оди на три чешми да наполни вода, а лицето ѝ е покриено со вел за да се скрие од љубопитните погледи.

Галичката свадба продолжи денес (13.07) со адетот познат како „канење на мртвите“, а зетот со неколку свадбари ги посети гробовите на починатите.

Оттаму, сите заедно заминаа во куќата на кумот за да го поканат на свадбата.

Адетите продолжија со традиционалното бричење на зетот, по што свадбарите тргнаа по невестата.

А таа, ги пречека во својата соба од која претходно, застаната на прозорецот, преку прстен го гледаше младоженецот.

„Низ прстен те гледам, в срце да ти влезам“ - се зборовите што ги кажува додека гледа во идниот сопруг.

Невестата, потоа слезе во дворот на куќата каде доби дарови од свекрвата, а таа, според традицијата, ѝ ги бакна рацете на својата идна свекрва.

Следен беше обичајот на сеење брашно сред село, по што Јован и Лилјана заминаа во црквата Св. Петар и Павле за да се венчаат.

Свадбата продолжи со веселбата среде Галичник - се играа ора, се слушаше звукот на зурлите и тапаните.

А токму тие вечерва, во доцна во ноќта, ќе го одбележат крајот на уште една Галичка свадба.

Погледнете го видеото ТУКА. 

А. Ј. | Црнобело / фото: Принтскрин YouTube - МЗ Галичник